«Kamaroŭka» abiacaje źnižki, akcyi i dehustacyi ŭ pieradśviatočnyja dni
Minski Kamaroŭski rynak z 24 śniežnia pa 7 studzienia budzie pravodzić źnižki, akcyi i dehustacyi pradukcyi, paviedamiŭ siońnia na apieratyŭnaj naradzie ŭ Minharvykankamie hienieralny dyrektar pradpryjemstva Mikałaj Chmialnicki.
Mikałaj Chmialnicki prainfarmavaŭ, što 24 śniežnia na płoščy pierad «Kamaroŭkaj» adbudziecca kaladny kirmaš, dzie budzie arhanizavany prodaž šyrokaha asartymientu spažyvieckich tavaraŭ, suvieniraŭ, vypiečki, hlintviejnu, łasunkaŭ. Praduhledžana kulturna-zabaŭlalnaja prahrama.
Da kanca śniežnia rynak budzie pracavać biez vychadnych, «Kamaroŭka» adkryta dla pakupnikoŭ 19, 26 śniežnia, a taksama 2 studzienia z 9.00 da 19.00. 1 studzienia handal ažyćciaŭlacca nie budzie. Asablivuju ŭvahu ŭ pieradnavahodnija dni administracyja pradpryjemstva i strukturnyja padraździaleńni Minharvykankama ŭdzielać manitorynhu cen z fotafiksacyjaj, kab praduchilić śpiekulacyi pradprymalnikaŭ.
«Takaja rabota daje stanoŭčy vynik. Jak pakazvaje praktyka, u pieradśviatočnyja dni ŭdajecca zachavać stabilny ŭzrovień cen», — adznačyŭ Mikałaj Chmialnicki.
Z 15 listapada na «Kamaroŭcy» arhanizavany handal navahodniaj suvienirnaj pradukcyjaj, z 8 śniežnia pracuje kirmaš pa prodažy štučnych jełak, z 20 śniežnia adkryjecca placoŭka pa realizacyi žyvych jełak i chvojnych dreŭ u kadcy.