Śpiecpradpryjemstva Nacbanka źniščyć 10 vahonaŭ «starych» hrošaj
Śpiecpradpryjemstva Nacbanka ŭtylizuje 10 vahonaŭ «starych» hrošaj. Z Novaha hoda jany całkam źnikli z abarotu, ale ich jašče možna abmianiać u bankach.
Fota Siarhieja Hudzilina.
Jak piša hazieta «Respublika», u Nacbanku padličyli, što piatnaccać hadoŭ u abarocie byli 600 miljonaŭ kupiur uzoru 2000 hoda. Heta kala 7,5 tysiačy kantejnieraŭ, jakija vykarystoŭvajucca dla mižbankaŭskich pieravozak, albo 600 ton banknot. Pakolki hruzapadymalnaść adnaho čyhunačnaha vahona składaje ŭ siarednim 60 ton, atrymlivajecca, što ŭsie «staryja» hrošy možna było b vyvieźci ŭ dziasiatku vahonaŭ. Adnak heta nie spatrebiłasia, pakolki kupiury z abarotu prybirali pastupova.
U Nacbanku kažuć, što kali banknoty naminałam 50 tysiač, 100 tysiač i 200 tysiač rubloŭ z abarotu zabrali praktyčna całkam, a kupiury vartaściu 5 tysiač, 10 tysiač i 20 tysiač rubloŭ — na 72%, to 2/3 drobnych hrošaj (100, 500 i 1000 rubloŭ) jašče znachodziacca na rukach u hramadzian. Praktyka pakazvaje, što ŭ kasy centralnych bankaŭ viartajecca tolki pałova takich kupiur.
Śpiecyjalnaje prystasavańnie zdrabniaje «staryja» hrošy. Paŭtony kupiur jano pierapracoŭvaje za dźvie hadziny pracy. Atrymlivajecca, što na pierapracoŭku 600 ton spatrebicca 2400 hadzin, ci 100 dzion. Užo źniščana 177,5 młn asobnikaŭ banknot uzoru 2000 hoda, heta bolš za 58% ad kolkaści hrošaj, jakija pastupili ŭ Nacbank.
Taksama na pierapracoŭku daviadziecca adpravić kala 23 tysiač kasavych aparataŭ, jakija nielha pieraprahramavać na pracu z kapiejkami.