Zabojca ihumieńni z Barysaŭskaha rajona była jaje chrosnaj dačkoj
Fota Śviatłany Kurejčyk, Młyn.by.
Ihumieńnia Cviata-Ksienijeŭskaha žanočaha manastyra matuška Vasilisa była zabitaja ŭ vioscy Barań Barysaŭskaha rajona 5 studzienia.
Jak paviedamili va ŭpraŭleńni Śledčaha kamiteta pa Minskaj vobłaści, pa fakcie zabojstva ihumieńni raspačataja sprava. U dačynieńni da padazravanaj pryznačanaja psichołaha-psichijatryčnaja ekśpiertyza.
Pavodle infarmacyi Barysaŭskaj jeparchii Biełaruskaj pravasłaŭnaj carkvy, u napadzie na ihumieńniu Śviata-Ksienijeŭskaha žanočaha manastyra matuchnu Vasilisu padazrajecca 29-hadovaja hramadzianka Biełarusi, uradženka Kazachstana, jakaja žyvie pry manastyry. Jaje časova prytulili tam, žadajučy dapamahčy ŭ vyrašeńni žyćciovych prablem. «Na praciahu jaje znachodžańnia ŭ manastyry, asabliva napiaredadni taho, što zdaryłasia, adznačałasia psichičnaje rasstrojstva maładoj žančyny, jakoje i stała pryčynaj jaje strašnaha ŭčynku», — paviedamiła pres-słužba jeparchii.
Jak kažuć žychary Barani, padazravanaja była chrosnaj dačkoj ihumieńni.
Raźvitańnie z pamierłaj adbudziecca 8 studzienia.
Ihumieńnia Vasilisa (Miadźviedź) naradziłasia 10 sakavika 1949 hoda ŭ horadzie Sośnica Čarnihaŭskaj vobłaści (Ukraina). Była prychadžankaj Pietra-Paŭłaŭskaha sabora ŭ Minsku, zatym paśla ŭtvareńnia Jelizaviecinskaha siastrynstva pry sabory stała siastroj miłasernaści. U 2001 hodzie słužyła pasłušnicaj Śviata-Jelisaviecinskaha žanočaha manastyra pad Minskam, potym pryniała postryh. Z 2004 hoda z dabrasłavieńnia mitrapalita Minskaha i Słuckaha Fiłareta, patryjaršaha ekzarcha ŭsiaje Biełarusi, — ihumieńnia Śviata-Ksienijeŭskaha žanočaha manastyra ŭ vioscy Barań Barysaŭskaha rajona.