Prakuratura: dryftar z płoščy Pieramohi byŭ pjany. Kryminalnaja sprava nakiravanaja ŭ sud
Prakuratura horada Minska vyvučyła materyjały kryminalnaj spravy ŭ dačynieńni da 27-hadovaha minčuka, što dryftavaŭ na Mercedes-Benz S300 na płoščy Pieramohi. Akazałasia, što mužčyna ŭ momant ździajśnieńnia złačynstva byŭ pjany. Ab hetym paviedamlajecca na sajcie Hienieralnaj prakuratury Biełarusi.
U chodzie praviadzieńnia pravierki śledčyja vyśvietlili, što kiroŭca znachodziŭsia ŭ stanie ałkaholnaha apjanieńnia. Vyvučeńnie kryminalnaj spravy pakazała, što papiaredniaje rasśledavańnie praviedziena ŭsiebakova, poŭna i abjektyŭna. Kryminalnaja sprava nakiravanaja ŭ sud Partyzanskaha rajona dla razhladu, — raspaviali auto.tut.by ŭ staličnaj prakuratury.
U noč na 29 listapada 27-hadovy minčuk zładziŭ dryft na płoščy Pieramohi i trapiŭ u pole zroku pravaachoŭnikaŭ. Kiroŭca pasprabavaŭ źbiehčy, ale byŭ zatrymany supracoŭnikami DAI. Inśpiektary skłali na parušalnika šeść administracyjnych pratakołaŭ. Dva pratakoły atrymaŭ pasažyr Mercedes.
U siaredzinie śniežnia kiroŭcu Mercedes pazbavili pravoŭ na 18 miesiacaŭ i aštrafavali na 630 rubloŭ. Štraf u šeść bazavych vieličyń (126 rubloŭ) atrymaŭ i pasažyr Mercedes, jaki zdymaŭ dryft na videa.
Paźniej kiroŭca Mercedes prajšoŭ sudova-psichijatryčnuju ekśpiertyzu, jakaja pakazała, što jon moh u poŭnaj miery ŭśviedamlać značeńnie svaich dziejańniaŭ i kiravać imi. Na padstavie sabranych dokazaŭ mužčynu pradjavili abvinavačvańnie pa č. 1 art. 339 (Chulihanstva) i č. 2 art. 346 (Ździek z historyka-kulturnych kaštoŭnaściej) Kryminalnaha kodeksa Respubliki Biełaruś.