Tramp choča źmianić pryncyp rehulavańnia internet-dostupu
U siaredzinie śniežnia na pasiadžeńni Fiederalnaj kamisii pa pytańniach suviazi (FCC) daradcy novaabranaha prezidenta ZŠA Donalda Trampa vykazalisia za skasavańnie pravił «sietkavaha niejtralitetu», jakija byli raspracavanyja administracyjaj Abamy.
Adzin ź siabroŭ kamisii Adžyt Pai skazaŭ, što dni sietkavaha niejtralitetu źličany.
Raźbiaromsia z tym, što heta takoje i jak admiena sietkavaha niejtralitetu adabjecca na nas.
Sietkavy niejtralitet — pryncyp rehulavańnia pravajdaraŭ suviazi, jaki zabaraniaje dyskryminacyju imi jakoha-niebudź kantentu, dadatku, sajta, płatform i servisaŭ. Heta značyć, što nie važna, jak vy vykarystoŭvajecie svoj internet-trafik (na anłajn-hulni, prahlad videa, razmovu praz Viber ci prosta čytajecie naviny), u lubym vypadku roznyja vidy trafiku buduć mieć adnolkavuju chutkaść i taryfikacyju.
A voś kali mabilnyja apieratary ŭ niekatorych krainach sprabujuć licenzavać asobnyja servisy albo pa-roznamu taryfikavać dostup na roznyja sajty, to heta źjaŭlajecca adychodam ad pryncypu sietkavaha niejtralitetu.
Abaroncy sietkavaha niejtralitetu miarkujuć, što dadzieny pryncyp spryjaje inavacyjam, padtrymlivaje svabodu słova i samavyjaŭleńnia, a taksama abaraniaje pravy spažyŭcoŭ IT-pasłuh.
Hučyć dobra, ale na praktycy pryncyp maje istotnuju supiarečnaść: dziela svabody adnoj industryi čynoŭniki abmiažoŭvajuć svabodu inšaj. Sietkavy niejtralitet faktyčna źjaŭlajecca formaj rehulacyi, jakaja abmiažoŭvaje dziejnaść telekamunikacyjnych kampanij.
U asnoŭnym sietkavy niejtralitet padtrymlivajecca bujnymi pastaŭščykami internet-kantentu (Google, Yahoo, eBay), hrupami abarony pravoŭ spažyŭcoŭ, levymi i libieralnymi palityčnymi kołami. U svaju čarhu suprać hetaj kancepcyi vystupajuć bujnyja telekamunikacyjnyja kampanii, vytvorcy sietkavaha abstalavańnia i łabisty rynkavych svabod.
Taksama siarod praciŭnikaŭ sietkavaha niejtralitetu bolšaść respublikancaŭ, jakija ŭsprymajuć dadzienuju kancepcyju jak formu rehulacyi.
Suprać sietkavaha niejtralitetu vystupajuć i siabry-respublikancy z kamisii FCC. U dadzieny momant u kamisii FCC dva respublikancy i try demakraty. Ale siabry kamisii pryznačajucca prezidentam ZŠA, tamu možna čakać, što situacyja ŭ chutkim časie źmienicca na karyść respublikancaŭ.
Ale niahledziačy na pryniatyja pry administracyi Abamy praviły sietkavaha niejtralitetu, žorstka jany nikoli nie vykonvalisia. Biaśsille rehulatara ŭžo nie raz było pravierana na praktycy, kali kampanija AT&T paśpiachova paźbiehła pakarańnia za błakavańnie servisu Facetime praz mabilnuju suviaź.
Padobnaja situacyja skłałasia i ŭ Kanadzie, dzie, niahledziačy na isnavańnie pravił sietkavaj niejtralnaści, nie isnuje nijakaha miechanizmu prymusu kampanij da ich vykanańnia.
U kastryčniku 2015 hoda Jeŭrakamisija pryniała bolšaściu hałasoŭ pahadnieńnie pra adzinyja dla ŭsiaho ES pryncypy sietkavaha niejtralitetu. Deputaty Jeŭraparłamienta śćviardžajuć, što pryniatyja praviły robiać Jeŭropu «adzinym u śviecie rehijonam, u jakim na zakanadaŭčym uzroŭni harantujucca pryncypy adkrytaha internetu».
U Paŭdniovaj Karei situacyja inšaja. Apieratary abjavili vajnu VoIP-servisam: ad poŭnaj błakiroŭki — da dadatkovaj taryfikacyi trafiku.
Biełaruskija apieratary nie błakujuć trafik miesendžaraŭ, ale jany majuć śpiecyjalnyja pakiety dla razmoŭ u miesendžarach i sacyjalnych sietkach.