Biełaruś atrymała $4,3 młn na adnaŭleńnie bałot
Na adnaŭleńnie bałot u ramkach mižnarodnaha prajekta PRAAN i Hłabalnaha ekałahičnaha fondu «Tarfianiki-2» Biełarusi vydzielena 4,3 młn dalaraŭ, paviedamiŭ 30 studzienia na pres-kanfierencyi ŭ Minsku načalnik upraŭleńnia bijałahičnaj i łandšaftnaj raznastajnaści Ministerstva pryrodnych resursaŭ i achovy navakolnaha asiarodździa Mikałaj Śvidzinski.
«Hetyja hrošy — układ mižnarodnaj techničnaj dapamohi ŭ zachavańnie biełaruskich ekasistem, u pryvatnaści bałot, jakija ŭjaŭlajuć unikalnuju kaštoŭnaść dla ŭsiaho Jeŭrapiejskaha kantynienta», — skazaŭ pradstaŭnik Minpryrody, adznačyŭšy, što srodki pojduć na raspracoŭku kancepcyi prajekta, a taksama niepasredna na vykanańnie rabot, źviazanych z adnaŭleńniem hidrałahičnaha režymu, ablasieńniem hetych terytoryj.
Ciapier idzie praces nacyjanalnaj rehistracyi prajekta, jaki pavinien być realizavany da 2030 hoda. Pačatak jaho vykanańnia zapłanavany na vierasień 2017 hoda. Pa słovach Śvidzinskaha, u reabilitacyi maje patrebu tracina bałotnych uhodździaŭ.
Da 2030 hoda, adznačyŭ jon, płanujecca adnavić 75 tys. ha parušanych tarfianikaŭ. Ahulnaja płošča tarfianikaŭ u Biełarusi składaje 2,39 młn ha, u naturalnym abo blizkim da naturalnaha stanie zachavałasia 863 tys. ha.
Pradstaŭnik Minpryrody paviedamiŭ, što letaś u ramkach prajekta «Tarfianiki-2» byŭ padrychtavany pieralik parušanych tarfianikaŭ krainy, jakija padlahajuć reabilitacyi. Ich płošča roŭnaja 143,3 tys. ha, acenačny košt paŭtornaha zabałočvańnia składaje kala 10 młn dalaraŭ.
Za minuły hod było paŭtorna zabałočana 14,5 tys. ha parušanych tarfianikaŭ. Akramia taho, adznačyŭ Śvidzinski, u ramkach realizacyi papiaredniaha mižnarodnaha prajekta «Tarfianiki-1» — praviedzienaja reabilitacyja 28 tys. ha bałot, paškodžanych u vyniku zdabyčy torfu i mielijaracyi.
Pavodle słoŭ pradstaŭnika Minpryrody, mierapryjemstvy pravodziacca ŭ ramkach stratehii zachavańnia i racyjanalnaha (ŭstojlivaha) vykarystańnia tarfianikaŭ, zaćvierdžanaj pastanovaj Savieta ministraŭ ad 30 śniežnia 2015 hoda № 1111.
Śvidzinski padkreśliŭ, što znachodžańnie bałot u naturalnym stanie dazvolić zachavać u ich kala 500 młn. t vuhlarodu i bolš za 7 młrd. kub. m zapasaŭ presnaj vady, źbierahčy miescy pražyvańnia i rostu dzikich žyvioł i raślin, uklučanych u Čyrvonuju knihu Biełarusi, zabiaśpiečyć uznaŭleńnie resursaŭ žuravin u abjomie bolš za 10 tys. ton štohod.