«Krumkačy» zapuścili abaniemientnuju prahramu na siezon-2017
Futbolny kłub «Krumkačy» zapuskaje prodaž abaniemientaŭ na svaje chatnija matčy ŭ Vyšejšaj lizie čempijanatu Biełarusi 2017 hoda, paviedamlajecca na aficyjnym sajcie kłuba.
krumka.by
Biletnym apierataram kłuba ŭ hetym siezonie budzie papularny partał bycard.by.
Zaŭziatary atrymajuć mahčymaść vybaru adnaho z troch typaŭ abaniemientaŭ: ALBUS bieły (bieły krumkač), čyrvony VARIUS (piaresty krumkač), čorny CORAX (čorny krumkač). Jany buduć adroźnivacca napaŭnieńniem. Kožny abaniemient vykanany ŭ vyhladzie kartki z aryhinalnym dyzajnam i budzie pradastaŭlacca ŭ pryhožaj skryncy, u jakoj, akramia samoj kartki, buduć lažać kalandar hulniaŭ na siezon, nalepki i inšyja pryjemnyja siurpryzy. Akramia hetaha płanujecca, što zaŭziatary atrymajuć mahčymaść brać udzieł u žyćci kłuba na praciahu ŭsiaho siezonu.
Košt biletaŭ na 15 chatnich matčaŭ pačynajecca ad 36 rubloŭ. Pry hetym adrazu dla braniravańnia miesca nieabchodna budzie ŭnieści tolki 30% ad koštu, a roźnicu možna budzie dapłacić pry atrymańni.
Adździeł markietynhu kłuba pastaraŭsia ŭličyć intaresy ŭsich katehoryj zaŭziataraŭ i dać dastupnyja varyjanty. Tak, studenty zmohuć atrymać źnižku 25%, a školniki 50%. Praduhledžanyja siamiejny i karparatyŭny pakiety.
«My chočam nie prosta pradavać miesca na stadyjonie, a pieratvaryć 15 našych chatnich matčaŭ u 15 śviatočnych dzion u žyćci našych zaŭziataraŭ! Užo ciapier płanujem, jakija aktyŭnaści budziem pravodzić, kab ludziam było cikava i viesieła bavić čas na stadyjonie. Bo futboł — heta śviata, my sami žyviom hetaj fiłasofijaj i zaražajem joj astatnich», — padkreśliŭ staršynia kłuba «Krumkačy» Dzianis Šunto.
Vybrać i kupić abaniemient možna ŭžo ciapier.