AAN nazvała vinavatych u vajennych złačynstvach u Siryi
Usie ŭdzielniki bajoŭ za Alepa, uklučajučy siryjskija ŭradavyja vojski, VKS RF, jakija padtrymlivali ich, a taksama siryjskuju apazicyju, ździajśniali vajennyja złačynstvy padčas sprobaŭ uziać horad pad kantrol u lipieni-śniežni 2016 hoda. Pra heta havorycca ŭ dakładzie niezaležnaj mižnarodnaj kamisii AAN pa rasśledavańni padziej u Siryi, apublikavanym u sieradu ŭ Ženievie, paviedamlaje DW.
Tak, u spravazdačy pakazvajecca, što VPS Siryi i VKS Rasii nanosili pa rajonach uschodniaha Alepa, jakija ŭtrymlivała apazicyja, «štodzionnyja pavietranyja ŭdary», u vyniku jakich sotni čałaviek byli zabityja, a taksama razburanyja niekalki miedycynskich ustanoŭ. Akramia taho, siryjskaja ŭradavaja avijacyja «naŭmysna» razbambiła kałonu z humanitarnym hruzam, što pryviało da 14 achviar i prypynieńnia apieracyi pa akazańni dapamohi miascovamu nasielnictvu, padkreślivajecca ŭ dakumiencie.
Asobnaha zhadvańnia taho, u jakich mienavita vajennych złačynstvach padazrajecca rasijski bok, u spravazdačy nie ŭtrymlivajecca, udakładniaje Reuters. Aŭtary dakładu, u pryvatnaści, adznačajuć vykarystańnie z pavietra kasietnych bojeprypasaŭ, adnak nie ŭskładajuć adkaznaść za heta adrasna — na Maskvu ci Damask. Narešcie, kamisija AAN źviartaje ŭvahu na toje, što siryjskija VPS ŭžyvali «bomby z chłarynam u nasielenych rajonach», što paciahnuła za saboj hibiel «sotniaŭ mirnych hramadzian».
Hienieralnaja asambleja AAN u śniežni 2016 hoda abviaściła ab stvareńni śpiecyjalnaj rabočaj hrupy. U jaje zadačy ŭvachodzić stvareńnie daśje materyjałaŭ ab vajennych złačynstvach u Siryi. Miarkujecca, što heta dapamoža mižnarodnym orhanam justycyi sabrać dakazalny materyjał, jaki jany zmohuć vykarystoŭvać dla pryciahnieńnia vinavatych da adkaznaści.