Tramp padpisaŭ novy ŭkaz ab mihrantach
Prezident ZŠA Donald Tramp padpisaŭ novy ŭkaz, jakim prypyniajecca na 90 dzion ŭjezd u ZŠA hramadzian šaści krain — Irana, Jemiena, Livii, Siryi, Samali i Sudana, paviedamlaje VVS.
Akramia taho, na 120 dzion prypynienaja prahrama pryjomu biežancaŭ u ZŠA. U adroźnieńnie ad papiaredniaha ŭkaza, Irak u hetym śpisie nie fihuruje.
Jak zajaviŭ na bryfinhu pradstaŭnik Biełaha doma, užo vydadzienyja vizy abo dazvoły na časovaje pražyvańnie ŭ ZŠA skasavanyja nie buduć.
Nahadajem, u kancy studzienia Donald Tramp padpisaŭ ukaz, jakim prypyniajecca pryjom Złučanymi Štatami biežancaŭ ź inšych krain. Ukaz, pavodle jaho słoŭ, zaklikany nie dapuścić u krainu «radykalnych musulmanskich terarystaŭ».
Rašeńnie Trampa vyklikała krytyku z boku AAN, a taksama pravaabarončych arhanizacyj i hramadskich dziejačaŭ, jak u ZŠA, tak i za ich miežami.
Paśla hetaha Fiederalny akruhovy sud u Ńju-Jorku nakłaŭ časovuju zabaronu na vysyłku mihrantaŭ ź dziejnymi amierykanskimi vizami z aeraportaŭ ZŠA.
4 lutaha Fiederalny sud u Sietle (štat Vašynhton) całkam prypyniŭ dziejańnie ŭkaza Donalda Trampa, a praz tydzień apielacyjny sud u San-Francyska pakinuŭ rašeńnie nižejstajačaj instancyi ŭ sile.