Novaja administracyja ZŠA ab pravach čałavieka ŭ Biełarusi: Ułady dziejničajuć z poŭnaj biespakaranaściu
U Biełarusi pa-raniejšamu niemahčymaja źmiena ŭłady šlacham vybaraŭ. Adsutnaść sistemy strymańniaŭ i procivah pryvodzić da złoŭžyvańnia jaje pradstaŭnikami.
Pra heta havorycca ŭ štohadovym dakładzie Dziarždepartamienta ZŠA ab vykanańni pravoŭ čałavieka ŭ 2016 hodzie, u pryśviečanym Biełarusi raździele. Dakumient padpisany novym Dziaržsakratarom Reksam Tylersanam.
U dakumiencie ŭkazvajecca, što ŭ Biełarusi da hetaha času tak i nie rasśledavali vypadki źniknieńnia palityčnych apanientaŭ ułady, a eks-palitviaźni zastajucca abmiežavanymi ŭ svaich pravach.
Siłavyja struktury pieravyšajuć paŭnamoctvy. Zatrymanyja padviarhajucca žorstkamu abychodžańniu padčas śledstva i ŭ turmach, umovy ŭtrymańnia ŭ jakich zastajucca drennymi.
Hramadzianie krainy cierpiać pieraśled i zatrymańni za krytyku ŭłady, za ŭdzieł u akcyjach pratestu.
Sudovuju sistemu krainy pa-raniejšamu nielha nazvać niezaležnaj.
Parušajucca hramadzianskija pravy i svabody, u tym liku svabody słova, druku, schodaŭ, asacyjacyj i relihii.
Niemahčymaść atrymać aficyjnuju rehistracyju pahražaje palityčnym partyjam, pravaabarončym i niaŭradavym arhanizacyjam kryminalnym pieraśledam.
U dakładzie taksama ŭzhadanyja fakty hvałtu i dyskryminacyi ŭ adnosinach da žančyn, dziaciej, ludziej ź nietradycyjnaj seksualnaj aryjentacyjaj; na parušeńnie pravoŭ asob z abmiežavanymi mahčymaściami; etničnych mienšaściaŭ; asob, jakija žyvuć ź VIČ / ŚNIDam.
«Ułady na ŭsich uzroŭniach dziejničali z poŭnaj biespakaranaściu i nie ŭ stanie pryniać miery dla sudovaha pieraśledu abo pakarańnia słužbovych asob u dziaržaŭnych i siłavych strukturach, jakija ździejśnili parušeńni pravoŭ čałavieka», — havorycca va ŭstupnaj častcy da dakładu.
Raździeł, pryśviečany Biełarusi, naličvaje 56 staronak ź pieralikam faktaŭ parušeńnia pravoŭ čałavieka ŭ krainie.