90-hadovamu słaŭharadskamu vieteranu Škirmankovu prakuror prosić try hady pazbaŭleńnia voli z adterminoŭkaj
Namieśnik prakurora Słaŭharadskaha rajona Iryna Słaŭnikava na pasiadžeńni 10 sakavika prapanavała sudu pakarać vieterana Vialikaj Ajčynnaj vajny, piśmieńnika Fieliksa Škirmankova tryma hadami pazbaŭleńnia voli z adterminoŭkaj vykanańnia prysudu na dva hady, piša 6tv.by.
90-hadovy vieteran abvinavačvajecca ŭ tym, što jon parušyŭ č.2 art. 317 i č.3 art. 159 KK RB, ździejśniŭšy pa nieaściarožnaści darožna-transpartnaje zdareńnie i paśla hetaha źjechaŭšy ź miesca DTZ, u vyniku čaho pakinuŭ paciarpiełuju žančynu ŭ ciažkim stanie.
DTZ adbyłosia ŭ Słaŭharadzie 9 listapada 2016 hoda. Fieliks Uładzimiravič na ŭłasnym aŭtamabili jechaŭ u balnicu, kab naviedać tam znachodziačujusia ŭ ciažkim stanie žonku, i źbiŭ žančynu-viełasipiedystku, a paśla źjechaŭ ź miesca zdareńnia. Žančyna atrymała zakryty pierałom levaj plečavaj kostki.
Padčas pasiadžeńnia Škirmankoŭ častkova pryznaŭ svaju vinu. Pa słovach Fieliksa Uładzimiraviča, u suviazi ź ciažkaj ankałahičnaj chvarobaj žonki, ź jakoj jany pražyli razam amal 70 hadoŭ, jon znachodziŭsia ŭ vielmi drennym psichałahičnym stanie. Pry vyjeździe na hałoŭnuju darohu jon ledź zdoleŭ paźbiehnuć sutyknieńnia ź inšym aŭtamabilem, tamu navat i nie zaŭvažyŭ, što pry vykanańni hetaha manieŭra začapiŭ viełasipied žančyny.
Padčas DTZ Škirmankoŭ byŭ ćviarozy, u kryvi paciarpiełaj žančyny było vyjaŭlena 0,53 pramile ałkaholu.
Prysud vieteranu vyniesuć, imavierna, 15 sakavika padčas nastupnaha sudovaha pasiadžeńnia. Padrabiaznaści pra spravu možna pačytać tut.