«Ja dla siabie raspracavała pryncyp «Dva Ł»: praviły žyćcia novaj ministarki pracy Iryny Kaścievič
14 sakavika Alaksandr Łukašenka pryznačyŭ 50-hadovuju Irynu Kaścievič novaj ministarkaj pracy i sacyjalnaj abarony. Jana minčanka, skončyła narhas i Akademiju kiravańnia. Apošnim časam jana źjaŭlałasia namieśnicaj ministra ekanomiki. A da hetaha 22 hady pracavała na roznych pasadach u Biełstacie (raniej — Ministerstva statystyki i analizu). «Naša Niva» zrabiła padborku vykazvańniaŭ novaj ministarki.
- Lubimym pradmietam u škole była matematyka, mianie zaŭsiody zachaplaŭ strojny, łahičny śviet ličbaŭ, praces rašeńnia mudrahielistych zadač, atrymańnie pryhožych vynikaŭ, ich dokazaŭ, usio heta prynosiła asablivaje zadavalnieńnie.
- Važna ŭmieć padzialać pracu i siamju, bo dla žančyny adnolkava značna i toje, i druhoje. Na žal, u mianie heta nie zaŭsiody atrymlivajecca. Časam prychodziš dadomu i spać kładziešsia z partfielem, litaralna 24 hadziny na sutki adčuvaješ siabie kiraŭnikom. Tak i składajecca žyćcio paśpiachovaj žančyny, jana jak majsterski akrabat pavinna bałansavać pamiž karjeraj i domam.
- Sučasnaja žančyna pavinna paśpieć usio — stać maci, zrabić karjeru. Chto choča, toj šukaje mahčymaści, a chto nie choča, šukaje pryčyny.
- U pracy starajusia być jak maha bolš demakratyčnaj. Lublu dziejničać u kamandzie, umieju čuć kaleh i padnačalenych, rašeńni prymaju z ulikam mierkavańnia bolšaści. Mnie impanujuć maładyja i kreatyŭnyja, vopytnyja i prafiesijnyja, a samaje hałoŭnaje, matyvavanyja ludzi ź inavacyjnymi dumkami i racyjanalnymi prapanovami. Adnak nie chavaju, u niekatorych momantach ja dosyć aŭtarytarnaja, pierš za ŭsio, heta vyjaŭlajecca ŭ zachavańni žorstkaj dyscypliny i kantroli za vykanańniem daručeńniaŭ.
- Dla siabie ja raspracavała praviła «Dva «Ł»». Pieršaje «Ł» — značyć, lubić tuju spravu, jakoj zajmaješsia. Druhoje «Ł» — značyć, lubić ludziej, ź jakimi pracuješ (viadoma, u hetym «Ł» jość vyklučeńni, hultajavatyja i nieprystojnyja ludzi pad jaho ŭpłyŭ nie traplajuć). Kirujučysia dadzienaj formułaj, ja stvaryła vartuju i zhurtavanuju kamandu.
- Hałoŭnym klučom da pośpiechu źjaŭlajecca maja siamja, razumieńnie i padtrymka rodnych, kachańnie muža i dziaciej. Jany stvarajuć atmaśfieru kamfortu i robiać mianie ščaślivaj žonkaj i mamaj. Dom — heta terytoryja, dzie možna rassłabicca, nabracca sił, zaradzicca pazityŭnymi emocyjami, nakarmicca enierhijaj adzin adnaho i adčuć luboŭ blizkich majmu sercu ludziej.
- Jak hramadzianin i jak dziaržaŭny słužačy ja liču, što luby dziaržaŭny orhan pry pryniaćci kiraŭničych rašeńniaŭ pierš za ŭsio jon pavinien padumać pra biznes. Heta pavinna być praviłam dla luboha dziaržaŭnaha słužačaha ŭ lubym dziaržaŭnym orhanie.
- Viedajecie što, mabyć, usio-tki, choć ni dnia nie pracavała ŭ biznesie, to kali kuryravała hety kirunak, siabie bolej adčuvała jak biznesoviec u dziaržaŭnym orhanie.