Prarasijskaja partyja paciarpieła parazu na vybarach u Niderłandach
Na parłamienckich vybarach u Niderłandach lidziruje pravalibieralnaja Narodnaja partyja za svabodu i demakratyju, jakuju ŭznačalvaje premjer-ministr krainy Mark Rute. Paśla apracoŭki bolš čym 90 pracentaŭ biuleteniaŭ jaje vynik składaje 21,2% hałasoŭ, paviedamlaje ahienctva dpa.
Taki vynik dazvolić partyi Rute atrymać u parłamiencie krainy 33 deputackija miescy. Pravapapulisckaja Partyja svabody na čale z Hiertam Viłdersam nabiraje ŭsiaho 13,1% hałasoŭ, što dazvalaje joj atrymać 20 deputackich mandataŭ z 150.
Mienavita na pieramohu Viłdersa rabiła staŭku Maskva. Heta niderłandski anałah francuzskaha Nacyjanalnaha frontu i niamieckaj «Alternatyvy dla Hiermanii».
Pa 19 miescaŭ u parłamiencie mohuć zaniać pradstaŭniki levalibieralnaj partyi «Demakraty-66» i «Chryścijanska-demakratyčnaha pryzyvu», piša Dw.de
Dla farmiravańnia kirujučaj kaalicyi Rute nieabchodna zaručycca padtrymkaj 76 deputataŭ. Napiaredadni hałasavańnia jon padkreśliŭ, što imaviernaści sajuza jaho partyi ź Viłdersam raŭniajecca nulu.
Pieramohu Rute pryvitali ŭ Hiermanii i Francyi. «Niderłandy! Niderłandy! Vy — čempijony! … Vinšuju z cudoŭnym vynikam vybaraŭ», — napisaŭ u Tvitary kiraŭnik aparata kanclerki Hiermanii Anhieły Mierkiel Pieter Altmajer.
«Vinšuju hałandcaŭ, pieraškodzili ŭzdymu krajnie pravych», — napisaŭ u svaim mikrabłohu kiraŭnik MZS Francyi Žan-Žak Ejro.
Hiert Viłders (Geert Wilders).
Viłders, natchniony pośpiecham Donalda Trampa ŭ ZŠA, aktyŭna vykarystaŭ u chodzie kampanii antyimihranckija i antyisłamskija łozunhi i rezka napadaŭ na marakanskuju i tureckuju dyjaspary Niderłandaŭ. Ale za hetaj rytorykaj stajała pieradusim žadańnie razvalić Jeŭrasajuz.
Drukujecca ŭ miežach śpiecyjalnaj rubryki «Naviny Hiermanii»