Arhkamitet Dnia Voli nie damoviŭsia ź Mikołam Statkievičam pra farmat akcyi 25 sakavika
Pieramovy pamiž arhkamitetam śviatkavańnia 25 sakavika i lideram BNK Mikołam Statkievičam ciahnulisia bolš za try hadziny.
Jak paviedamiŭ Svabodzie staršynia Partyi BNF Alaksiej Janukievič, damovicca pra supolny maršrut i farmat praviadzieńnia šeścia nie ŭdałosia.
«My nie pryjšli da ahulnaj pazycyi pa ŭsich niuansach praviadzieńnia akcyi 25 sakavika. Budziem jašče sustrakacca i abmiarkoŭvać», — kaža Janukievič.
Jon udakładniŭ, što
Partyja BNF vystupaje za toje, kab uvieś maršrut i scenar akcyi byŭ abvieščany zahadzia. Tamu što ŭ inšym vypadku ŭdzielnikam budzie ciažka patłumačyć, što pravakacyja, a što — nie. U hety ž čas niekatoryja inšyja arhanizatary, u tym liku Mikoła Statkievič, nastojvajuć na tym, kab «vyrašyć na miescy, aryjentujučysia na kolkaść i nastroj udzielnikaŭ».
«Siarod kalehaŭ niama pakul zhody, kab usie kropki byli rasstaŭlenyja zahadzia. Hety pryncypovy dla nas momant pakul zastajecca adkrytym».
Jak skazaŭ Janukievič, asnoŭnyja sprečki pamiž arhanizatarami viaducca nakont taho, dzie i jak akcyja pavinna zaviaršycca i ci pavinna heta być ahučana zahadzia.
Lider BNF ličyć, što kali arhanizatary nia zmohuć damovicca, to dyskusija budzie vyniesienaja ŭ publičnuju prastoru. Miarkujecca, što arhkamitet 25 sakavika budzie jašče raz sustrakacca ź Mikołam Statkievičam, ale kankretnaja data pakul nie pryznačana.
14 sakavika Mikoła Statkievič zajaviŭ, što biare na siabie adkaznaść za praviadzieńnie akcyi 25 sakavika.
U arhkamitet śviatkavańnia Dnia Voli ŭvachodziać ruch «Za svabodu», arhkamitet pa stvareńni partyi «Biełaruskaja chryścijanskaja demakratyja», Abjadnanaja hramadzianskaja partyja, Partyja BNF i ruch salidarnaści «Razam».
Pradstaŭniki hetych arhanizacyjaŭ čakajuć ź Mienharvykankamu adkazu na zajaŭku, u jakoj jany prosiać dazvolić 25 sakavika šeście ad Akademii navuk da skveru Janki Kupały.
Mikoła Statkievič pahadziŭsia ź miescam zboru, ale kaža, što miesca i farmat zaviaršeńnia akcyi treba vyznačać padčas jaje praviadzieńnia.
Tym časam spartova-patryjatyčny klub «Vajar» zaprašaje achvočych dałučacca da družyny achovy śviatočnaha šeścia 25 sakavika.