Biełaruskija hreka-katoliki zaklikajuć malicca za źniavolenych i za Biełaruś
«Śviata Dabravieščańnia, 25 sakavika, biełaruskija hreka-katoliki tradycyjna adznačajuć jak Dzień malitvy za Baćkaŭščynu. Sioleta, u śviatle apošnich balesnych padziej u Biełarusi, hreka-katalickaja supolnaść molicca taksama za źniavolenych za ŭdzieł u mirnaj demanstracyi», — havorycca ŭ paviedamleńni pres-słužby Apostalskaha Vizitatara Biełaruskaj Hreka-Katalickaj Carkvy.
Archimandryt Siarhiej Hajek
«Heta śviata ŭciełaŭleńnia Isusa Chrysta, jaki ŭvajšoŭ u historyju čałaviectva ŭ kankretny čas i ŭ kankretnym miescy. Pa Božamu Providu Jon atrymaŭ svaju ziamnuju Baćkaŭščynu. Dla nas heta vyklik, kab malicca za našuju Baćkaŭščynu Biełaruś, za ŭsich jaje žycharoŭ», — tłumačyŭ šmat hadoŭ tamu značeńnie hetaha śviata protapreźbitar biełaruskich hreka-katolikaŭ a. Jan Matusievič.
«Balesnyja padziei apošnich dzion, navat apošnich hadzin — asabliva ŭ Minsku, horadzie, jaki žyvie pad apiekaj Baharodzicy (ab čym śviedčyć staražytny hierb Minska) — zaklikajuć nas, kab my tym bolš rupliva i niastomna malilisia — razam z Baharodzicaj — za ŭsich žycharoŭ Minska, za ŭsich žycharoŭ Biełarusi. Tradycyja našaj Carkvy daje nam bahatuju spadčynu malitvy «za Boham ścieražonuju krainu našu Biełaruś i ŭvieś Biełaruski narod»», — adznačyŭ Apostalski Vizitatar dla hreka-katolikaŭ Biełarusi archimandryt Siarhiej Hajek 26 sakavika na Boskaj Liturhii ŭ parafii Śviatoha Ducha ŭ Minsku.
«Siońnia razam sa sv. Vasilom Vialikim molimsia: «Boža, budź pamiatlivy da tych, chto pad sudom, u viaźnicach», — i razumiejem, što miłaserny Hospad asabliva blizki im u bolu i ciarpieńniach. Tamu niastomna budziem praciahvać našuju vielikaposnuju salidarnuju malitvu, a da malitvy dałučym post dy inšyja formy duchoŭnaj salidarnaści», — zaklikaŭ ijerarch.