Pryznačana data suda nad Viačasłavam Kasinieravym
Praz dva tydni ŭ sudzie Maskoŭskaha rajona Minska raspačniecca razhlad kryminalnaj spravy aktyvista anarchisckaha ruchu Viačasłava Kasinierava, jakoha pieraśledujuć za pierfomans sa statujaj palicejskaha-haradavoha kala budynka MUS.
Raźbiralnictva pa spravie aktyvista, jakoje raspačniecca a 10-j hadzinie 27 krasavika, budzie vieści sudździa Alaksandr Pietraš, jaki ŭžo «zaśviaciŭsia» ŭ niadaŭnich administratyŭnych pracesach pa spravach zatrymanych padčas mirnaj akcyi ŭ Dzień Voli.
Da suda Viačasłaŭ Kasinieraŭ utrymlivajecca pad vartaj u SIZA №1 HUUS Minharvykankama, pakolki 6 krasavika sud Maskoŭskaha rajona Minska, razhledzieŭšy ŭ zakrytym režymie skarhu aktyvista na pryznačanuju mieru strymańnia, admoviŭsia jaho vyzvalić pad padpisku ab niavyjeździe.
Tym časam pravaabarončaja supolnaść Biełarusi zajaviła, što rasceńvaje kryminalny pieraśled Kasinierava jak niepraparcyjna žorstkuju reakcyju ŭładaŭ na jaho ŭčynak, abumoŭlenuju pomstaj orhanaŭ milicyi. Zaklučeńnie pad vartu i mahčymaje dalejšaje pazbaŭleńnie voli pravaabaroncy ličać praźmiernymi i skiravanymi na izalacyju aktyvista z metaj spynieńnia jahonaj publičnaj dziejnaści. 5 krasavika pravaabarončyja arhanizacyi vystupili z zajavaj ab pryznańni Viačasłava Kasinierava palityčnym źniavolenym i patrabujuć ad uładaŭ Biełarusi spynieńnia kryminalnaha pieraśledu i jaho nieadkładnaha vyzvaleńnia.
Viačasłavu Kasinieravu pradjaŭlena abvinavačvańnie ŭ ździajśnieńni złačynstva pa častcy 1 artykuła 339 Kryminalnaha kodeksa (chulihanstva) za praviedzieny im 12 sakavika 2017 h. kala budynku MUS pierformans, padčas jakoha jon nakinuŭ piatlu na ŭstalavanuju tam statuju palicejskaha-haradavoha, vykazaŭšy takim čynam svoj pratest suprać milicejskaha samavolstva i pieraśledu aktyvistaŭ anarchisckaha ruchu za ŭdzieł u mirnych akcyjach pratestu.