Rasijskija śledčyja: Terakt u Pieciarburhu finansavaŭsia z Turcyi
Akram Azimaŭ, brat mierkavanaha arhanizatara teraktu ŭ mietro Sankt-Pieciarburha, stelefanoŭvaŭsia sa śmiarotnikam Akbaržonam Džaliłavym i pieravodziŭ jamu hrošy, atrymanyja ŭ Turcyi ad člena mižnarodnaj terarystyčnaj hrupoŭki, vyśvietliŭ Śledčy kamitet Rasii. Pra heta paviedamlaje ria.ru.
Akramia hetaha, Azimaŭ zajmaŭsia padrobkaj dakumientaŭ, kab členy hetaj hrupoŭki mahli bieśpieraškodna pieramiaščacca pa terytoryi Rasii, havorycca ŭ rašeńni Basmannaha suda ab aryšcie Azimava.
Jakaja mienavita terarystyčnaja hrupoŭka finansavała terakt, nie ŭdakładniajecca.
Azimaŭ, jak i Džaliłaŭ, pavodle adznak u zamiežnym pašparcie, dvojčy vyjazdžali ŭ Turcyju — u śniežni 2016 hoda i ŭ sakaviku ciapierašniaha.
Akrama Azimava, brata mierkavanaha arhanizatara teraktu ŭ Pieciarburhu Abrora Azimava, zatrymali napiaredadni ŭ Novaj Maskvie. U jaho kanfiskavali bajavuju hranatu RHD-5.
Abrora Azimava zatrymali dvuma dniami raniej u Padmaskoŭi. Pavodle danych FSB, mienavita jon adkazvaŭ za padrychtoŭku terarysta-śmiarotnika Akbaržona Džaliłava.