Na Eviereście zahinuŭ adzin z samych viadomych alpinistaŭ Uli Štek
Alpinist Uli Štek, jaki za svaju niejmaviernuju chutkaść uzychodžańnia atrymaŭ mianušku «šviejcarskaja mašyna», zahinuŭ padčas aklimatyzacyi na Eviereście, paviedamlaje VVS.
AFP
Na hety raz jon źbiraŭsia padniacca na viaršyniu hary pa inšym maršrucie i biez kisłarodnaha bałona.
U Fiederacyi alpinizmu Niepała paviedamili, što Štek, imavierna, paśliznuŭsia. Jaho cieła znajšli na Eviereście, paśla čaho na viertalocie pieravieźli ŭ stalicu Niepała Katmandu.
U sieradu alpinist napisaŭ na svajoj staroncy ŭ fejsbuku, što za dzień jon padniaŭsia na 7 tysiač mietraŭ ad bazavaha łahiera i viarnuŭsia nazad, bo ličyŭ, što «aktyŭnaja aklimatyzacyja» — najlepšy sposab pryvykańnia da vialikaj vyšyni.
U 2012 hodzie Štek užo ŭzdymaŭsia na Evierest biez kisłarodnaha bałona, a ŭ 2015 hodzie jon zavajavaŭ usie 82 alpijskija piki, vyšejšyja za 4 tysiačy mietraŭ, za 62 dni.
Uli Štek pastaviŭ niekalki rekordaŭ pa zvyšchutkim adzinočnym uzdymie pa kłasičnych maršrutach. Jon taksama spryjaŭ papularyzacyi alpinizmu dziakujučy pryhodnickim filmam, źniatym pa matyvach jaho ŭzychodžańniaŭ.
Šteka prazvali «šviejcarskaj mašynaj» za jaho biaźlitasna mietadyčny padychod da spravy i niečałaviečuju ciahavitaść.
U 2015 hodzie jon uzyšoŭ na adnu z samych znakamitych viaršyniaŭ u śviecie — Paŭnočnuju ścianu Ejhiera — usiaho za 2 hadziny 47 chvilin. Heta niejmavierny vynik dla pieršych alpinistaŭ, u jakich hety šlach zajmaŭ niekalki dzion.