Navi i ich 25 kankurentaŭ za pieramohu na «Jeŭrabačańni-2017» — usie VIDEA vystupaŭ
za kaho vy pazaŭziejecie, aproč našych?
13 maja — finał «Jeŭrabačańnia». 26 krain buduć zmahacca za pieramohu, jakuju vyznačać žury i hladackaje hałasavańnie. Pradstaŭlajem vam ŭsich kankursantaŭ.
Izrail. IMRI — I Feel Alive
Imry ŭdzielničaŭ u konkursie užo ŭ 2015 i 2016 hadach, ale na bek-vakale. Ź dziacinstva Imry ŭmieje śpiavać na anhlijskaj i ispanskaj movach, hraje na hitary i pijanina, vyvučaŭ akciorskaje majsterstva i navat ahučvaŭ niekalki rolaŭ u multsieryjałach. U pieśni śpiavak raspaviadaje pra svoj šlach da pośpiechu, sprabujučy nikoli nie zdavacca.
Polšča. Kasia Moś — Flashlight
Kasia Moś naradziłasia ŭ siamji viadomaha polskaha dyryžora Marka Mosia. Ź dziacinstva jana išła pa baćkavym šlachu — skončyła muzyčnuju škołu, a paśla fakultet džaza i zabaŭlalnaj muzyki pa kłasu vakała. U 2002 hodzie jana zapisała svaju pieršuju pieśniu, u 2011 užo hrała ŭ kłubach Łas-Viehasa, a ŭ 2015 vypuściła solny albom. Paśla pieramohi ŭ nacyjanalnym adbory Kasia nie hublała čas i prajechałasia turam pa Jeŭropie, tamu ŭ jaje taksama vielmi dobryja šancy na vychad u finał.
Biełaruś. Naviband — Historyja majho žyćcia
Ksiuša i Arciom ź lohkaściu prajšli ŭ finał konkursu. Naviband užo dahrukalisia da sercaŭ biełarusaŭ i zamiežnikaŭ svaim «Hey-hey-hayayayayo». Upieršyniu na scenie ŭ finale mižnarodnaha piesiennaha konkursu prahučyć biełaruskaja mova. Pośpiechaŭ Arciomu i Ksienii!
Aŭstryja. Nathan Trent — Running On Air
Pop- i r'n'b-śpiavak Natan pačynajučy z troch hod braŭ uroki pa skrypcy i fartepijana. Paralelna z hetym jon vystupaŭ u dziaržaŭnym teatry. Papularnaść jon zajmieŭ dziakujučy ŭdziełu ŭ šou talentaŭ u Hiermanii i Aŭstryi. Pieršyja svaje pieśni Natan napisaŭ u 11 hadoŭ. Pieśnia, ź jakoj jon budzie vystupać, taksama častkova napisana śpievakom.
Armienija. Artsvik — Fly With Me
Śpiavačka Arćvik budzie viadomaja amataram rasijskaha šou «Hołas», bo jana ŭdzielničała tam u druhim siezonie. U 5 hod razam z baćkami jana pierajechała ŭ Maskvu, tam advučyłasia ŭ škole z matematyčnym uchiłam, paśla skončyła ŭniviersitet pa śpiecyjalnaści psichołah-łahapied. Ale muzyka pieramahła. U 2012 hodzie Arćvik udzielničaje adrazu ŭ dvuch konkursach i heta prynosić joj peŭnuju papularnaść. Dziakujučy vystupam u jaje atrymałasia pradstavić Armieniju na Jeŭrabačańni ŭ Kijevie. U svaich pieśniach Arćvik vykarystoŭvaje narodnyja matyvy, časam pieraśpiavaje narodnyja pieśni.
Niderłandy. OG3NE — Lights and Shadows
Dziavočy hurt, jaki składajecca z troch siaścior: Lizy, Emi i Šeli. U 2007 hodzie jany prezientavali Niderłandy na dziciačym konkursie pieśni «Jeŭrabačańnie» i zaniali tam 11-je miesca. Ich pieśnia napisana baćkam, kab addać daninu maci, jakaja ciažka chvareła. «My zrobim usio, što ŭ našych siłach, kab naša kraina hanaryłasia nami. My chočam bačyć horduju ŭśmiešku na tvary našaj maci. Heta naš sposab skazać dziakuj za ŭsio, što jana dała nam, i za toje, što jana značyć dla nas», — kažuć vykanaŭcy.
Małdova. Sunstroke Project — Hey Mamma
Nu kudy ž biez vykanaŭcaŭ, ad jakich tak i pre pazityvam. Hurt «Sunstroke Project» užo pradstaŭlali Małdovu na konkursie ŭ 2010 hodzie, ale tady zaniali 22-je miesca. U toj raz jany vystupili tak jaskrava, što ich saksafanist staŭ miemam. U 2012 hodzie hurt taksama sprabavaŭ prabicca na Jeŭrabačańnie, ale z-za abvinavačvańnia ŭ płahijacie nie prajšoŭ navat u pieršy etap nacyjanalnaha adboru. Sioleta hurt taksama vystupaje z davoli jarkaj pieśniaj, ale bukmiekiery nie nadta vysoka aceńvajuć ich šancy.
Vienhryja. Joci Pápai — Origo
Vienhierski śpiavak, repier i hitaryst cyhanskaha pachodžańnia. Joci —iašče adzin vykanaŭca, jaki budzie vykonvać pieśniu na svaich movach — vienhierskaj i cyhanskaj. Publičny debiut Papai adbyŭsia ŭ 2005 hodzie, kali jon byŭ udzielnikam miascovych šou talentaŭ. A jašče śpiavak na siońnia maje až 6 albomaŭ. U ankiecie Joci adznačyŭ, što jahonaja pieśnia — reziume ŭsiaho jahonaha žyćcia.
Italija. Francesco Gabbani — Occidentali's Karma
Samy imavierny pieramožca pa viersii bukmiekieraŭ. Siamja Habani vałodała kramaj muzyčnych instrumientaŭ, tamu jon z rańniaha dziacinstva byŭ pryvučany da muzyki. U vasiamnaccać hadoŭ, jašče da zakančeńnia vučoby ŭ licei, padpisaŭ svoj pieršy kantrakt, dva sinhły jakoha ŭvajšli ŭ ratacyju asnoŭnych muzyčnych telekanałaŭ Italii. Vykonvać pieśniu Frančeska budzie pa-italjansku.
Danija. Anja — Where I Am
21-hadovaja Ania naradziłasia i vyrasła ŭ Aŭstralii, ale aboje jaje baćki datčanie. Jašče ŭ 2014 hodzie sa svajoj pieśniaj «Where I Am» jana pieramahła na aŭstralijskim konkursie. Pryčym Ania prymała niepasredny ŭdzieł u napisańni pieśni. Śpievami dziaŭčyna zajmałasia z samaha dziacinstva, a svaje pośpiechi vykładvała na Jutubie.
Partuhalija. Salvador Sobral — Amar Pelos Dois
Partuhalec Salvador Sabrał — jašče adzin finalist, chto budzie śpiavać nie pa-anhlijsku. I ŭ jaho davoli niebłahija šancy, bo jon i italjaniec siońnia na pieršych miescach u bukmiekieraŭ. Niehledziačy na svaju ścipłaść, Salvador u dziacinstvie abjeździŭ uvieś śviet, udzielničaŭ u šmatlikich konkursach i maje svoj solny albom. Mahčyma, jon skaryŭ usich svajoj prastatoj?
Azierbajdžan. Dihaj — Skeletons
Dyjana Hadžyjeva, vakalistka «Dihaj», maje ŭkrainskija karani. Naradziłasia ŭ 1989 hodzie ŭ Maryupali. Ź dziacinstva zajmałasia muzykaj, skončyła muzyčnuju akademiju, zajmałasia džazam na prafiesijnym uzroŭni. Jašče ŭ 2010 hodzie Dyjana sprabavała pieramahčy ŭ nacyjalnym adbory, ale nie zmahła prajści ŭ finał. U 2014 byŭ stvorany hurt «Dihaj», ź jakim śpiavačka źbirajecca pieramahčy na Jeŭrabačańni-2017. Bubnačom u hurcie, darečy, źjaŭlajecca muž Dyjany.
Charvatyja. Jacques Houdek — My Friend
Charvat Žak umieje pryciahvać da siabie ŭvahu, na videadziońnikach Jeŭrabačańnia jon źjaŭlaŭsia ŭžo nie raz. Na radzimie jon adna z samych papularnych pop-zorak. Bahataja dyskahrafija Žaka naličvaje 13 albomaŭ. Žak zajmajecca dabračynnaściu, dzie dapamahaje asobam z abmiežavanymi mahčymaściami i dzieciam. Svaju pieśniu jon budzie vykonvać pa-anhlijsku i italjansku. Dla śpievaka pieśnia — himn, dzie žyćcio paraŭnoŭvajecca z cudam, pieśnia, jakaja zaachvočvaje nas žyć kožny dzień u poŭnaj miery i być tym, kim my pavinny być u žyćci.
Aŭstralija. Isaiah — Don't Come Easy
Aŭstralija dakazała, što moža ździŭlać na «Jeŭrabačańni». U hetym hodzie krainu budzie pradstaŭlać 17-hadovy śpiavak. Ajzaja u 2016 hodzie ŭdzielničaŭ u miascovym konkursie X-faktar, uvieś svoj čas pryśviačaje muzycy. Pavodle jaho słoŭ, najbolšy ŭpłyŭ na jaho zrabiła Maraja Kery, ź jakoj śpiavak choča kali-niebudź praśpiavać duetam. Jaho pop-bałada «Don't Come Easy» raspaviadaje pra maru i zmahańnie za jaje.
Hrecyja. Demy — This is Love
Afinskaja pryhažunia Dzimitra Papadeja taksama maje dastatkova vialikija šancy na vychad u finał. Dziaŭčynu zaŭsiody ciahnuła ŭ muzyku, niehledziačy navat na toje, što jana maje vyšejšuju jurydyčnuju adukacyju. Prajekt «Demy» Dzimitra zasnavała jašče ŭ 2011 hodzie. Z taho času śpiavačka maje 2 albomy, 15 sinhłaŭ, a taksama ŭznaharody ad MTV, hrečaskich telekanałaŭ i časopisaŭ.
Ispanija. Manel Navarro — Do It For Your Lover
Pieśnia ispanca Manela źjaŭlajecca chitom na radzimie śpievaka. 21-hadovy Navara źjaŭlajecca maładym kampazitaram i śpievakom, čyja muzyka ŭjaŭlaje saboj sumieś upłyvaŭ ad Boba Dyłana da Eda Šyrana. Hurt zaŭsiody sprabuje łamać formu pop-muzyki. Manel ličyć, što jahonaja pieśnia — heta zusim novy styl dla Ispanii. Pieśnia budzie vykonvacca na ispanskaj i anhlijskaj movach.
Narviehija. JOWST — Grab The Moment
Adzin z samych cikava aformlenych vystupaŭ. Hurt prajšoŭ vialiki šlach da vialikaj sceny — ad pracy hukarežysiorami i nastaŭnikami ŭ muzyčnych škołach da ŭdziełu ŭ topavych konkursach Narviehii. Padčas napisańnia pieśni chłopcy stvaryli zakryty čat u fejsbuku, dzie atrymlivali advarotnuju suviaź ad fanataŭ. Ci dapamoža im heta, kab vyjści ŭ finał konkursu? Pabačym.
Vialikabrytanija. Lucie Jones — Never Give Up On You
Lusi Džons — śpiavačka i aktrysa z Paŭdniovaha Uelsa. Jana maje bahaty sceničny vopyt, pačynajučy z «Ch-faktaru» u 2009 hodzie, dzie była finalistkaj. Adtul jana pačała vielmi paśpiachovuju muzyčna-teatralnuju karjeru. Za apošnija 7 hod Lusi zajmieła vialikuju kolkaść teatralnych uznaharod. Siarod cikavostak, śpiavačka fanacieje ad Hary Potera — u svaich intervju adznačała, što ŭmieje hrać saŭndtrek na flejcie i fartepijana.
Kipr. Hovig — Gravity
Kiprski śpiavak armianskaha pachodžańnia Ovih Demirčan nie z samaha pačatku vyrašyŭ, čym jon choča zajmacca. Skončyŭšy ŭniviersitet, jon pracavaŭ markietołaham u ofisie, ale ŭ peŭny momant zrazumieŭ, što choča inšaha. Tak Ovih i raspačaŭ karjeru śpievaka. Jon navučyŭsia hrać na hitary i fartepijana, a taksama vyvučaŭ džaz i vakał. Ovih staŭ viadomy dziakujučy ŭdziełu ŭ šou X-faktar u 2009 hodzie, dzie finišavaŭ na siomym miescy. Paśla jahonaha vystupu ŭ paŭfinale ŭ internecie pačali rabić miemy, u jakich adznačali padabienstva vystupu ź Siarhiejem Łazaravym, jaki pradstaŭlaŭ Rasiju letaś.
Rumynija. Ilinca ft. Alex Florea — Yodel It!
Hety duet — adziny hurt u Rumynii, jaki śpiavaje ŭ jodlinh-styli. Akramia hetaha, hurt vykarystoŭvaje rok i rep-aranžyroŭki, kab, pa ich słovach, pakazać, nakolki jany lubiać muzyku. Ilinka vystupała ŭ opiery, tamu ź lohkaściu moža śpiavać falcetam, a Aleks — akcior, tamu ź lohkaściu ŭvachodzić u roznyja vobrazy ŭ zaležnaści ad žanru. Niahledziačy na toje, što duet prezientuje Rumyniju, adčuvajucca niejkija irłandskija matyvy, vam tak nie padajecca?
Hiermanija. Levina — Perfect Life
U ankiecie śpiavački Levin napisana — idealnaje skandynaŭskaje začaravańnie z chrypłym hołasam mižnarodnaha kłasa i pieśniaj, jakaja budzie radavać Jeŭropu. Stać papularnaj śpiavačcy dapamoh udzieł u nacyjanalnym muzyčnym konkursie jašče ŭ 9 hod. Pieršuju svaju pieśniu Levin napisała ŭžo ŭ 12. Dla vychadu na prafiesijny ŭzrovień vyvučała vakał u Łondanie. Levin žyvie i pracuje ŭ Bierlinie i Łondanie. Jaje pieśnia raspaviadaje pra daskanałaje žyćcio.
Ukraina. O.Torvald — Time
Kraina-prymalnik «Jeŭrabačańnia» budzie vystupać ź pieśniaj u rok-žanry. Hurt «O.Torvald» byŭ stvorany ŭ Pałtavie i na siońnia maje 5 albomaŭ. Stolki ž u hurcie i muzykaŭ. Darečy, apošni albom vykanaŭcaŭ pradziusavaŭ biełarus Kirył Maciušenka. Chłopcy tak upeŭnienyja, što zojmuć vysokija miescy, što ŭ ich paśla «Jeŭrabačańnia» ŭžo raśpisany tur pa zachodniaj Jeŭropie.
Bielhija. Blanche — City Lights
Jašče adna favarytka sioletnaha konkursu. Eli Dełvoks, jakaja vystupaje pad psieŭdanimam Blanche, naradziłasia ŭ Bruseli. Vy nie pavierycie, ale joj usiaho 17 hod. Śpiavačka ŭdzielničała ŭ roznych konkursach, ale nie sa svaimi pieśniami. Jaje «City Lights» («Ahni horadu») — pieršaja ŭłasnaja pieśnia. Pryčym, miarkujučy pa staŭkach bukmiekieraŭ, vyjšła davoli dobra:
Šviecyja. Robin Bengtsson — I Can't Go On
Papularnaść napatkała śpievaka paśla ŭdziełu ŭ konkursie «Idol 2008», dzie jon zaniaŭ treciaje miesca. U dyskahrafii Robina 13 sinhłaŭ i nivodnaha alboma. Ale heta nie pieraškodziła jamu pieramahčy ŭ adbory na Jeŭrabačańnie z zapalnaj pieśniaj «I Can't Go On». 27-hadovy švied źjaŭlajecca adnym ź sioletnich favarytaŭ.
Bałharyja. Kristian Kostov — Beautiful Mess
Krystyjan Kostaŭ taksama ličycca favarytam konkursu. Jon naradziŭsia ŭ Maskvie, jahonaja maci kazaška, a baćka — bałharyn. Jaho buduć viedać tyja, chto sačyŭ za šou «Hołas. Dzieci». Akramia hetaha, śpiavak zaniaŭ 2-je miesca ŭ bałharskim prajekcie «Ch-faktar». U 2012 hodzie śpiavak śpiavaŭ za Bałharyju na «Novaj chvali», dzie zaniaŭ siomaje miesca. Jak vy zrazumieli, pasłužny śpis u hetaha chłopca dastatkova vialiki. Pry hetym jon samy małady vykanaŭca na sioletnim «Jeŭrabačańni».
Francyja. Alma — Requiem
Ałma — śpiavačka, pijanist i aŭtar piesień. Śpiavačka ŭ svaich pieśniach sprabuje pieradavać žyćcio — jaje i ŭsich ludziej. Svaje pieršyja pieśni jana napisała za miažoj, dzie vučyłasia ŭ biznes-škole. Ałma pradstavić svoj sinhł «Requiem», jaki pakazvaje, jak jaje pošuki kachańnia nikoli nie skančajucca. Sama śpiavačka ŭ intervju adznačała, što pieśnia robić jaje ščaślivaj. Pieśnia budzie vykonvacca na francuzskaj i anhlijskaj movach.