Hałoŭreda «Echa Moskvy» ablili viski ŭ Pieciarburhu
U Pieciarburhu aktyvisty «Inšaj Rasii» vylili na hałoŭnaha redaktara «Echa Moskvy» Alaksieja Vieniadziktava try butelki viski. Heta zdaryłasia ŭ Aleksandrynskim teatry, dzie Vieniadziktaŭ braŭ udzieł u prajekcie «Adkrytyja dyjałohi».
«Fontanka» sa spasyłkaj na lidara druharosaŭ Andreja Dźmitryjeva paviedamlaje, što padčas dyskusii na novaj scenie Aleksandrynskaha teatra troje nacbołaŭ vybiehli na scenu, dzie Alaksiej Vieniadziktaŭ debatavaŭ z Alaksandram Prachanavym. Padbiehšy da Vieniadziktava, jany vylili na jaho try butelki viski i raskidali ŭlotki.
Vieniadzikataŭ nie razhubiŭsia, kali jaho ablili, a navat prakamientavaŭ, zajaviŭšy ŭsłych: «Viskar — h*ŭno».
Dźmitryjeŭ zajaviŭ, što tak nacboły chacieli «nahadać» žurnalistu pra padziei 2011 hoda, kali Vieniadziktaŭ «damoviŭsia z maskoŭskaj meryjaj ab pieranosie paślavybarčych pratestaŭ dalej ad budynka Centrvybarkama, a paśla damoŭlenaści vypiŭ viski z namieśnikam kiraŭnika Administracyi prezidenta».
Taksama jon adznačyŭ, što jaho kalehi ličać, što «Echo» niapravilna aśviatlaje ŭkrainskaje pytańnie.
Aktyvistaŭ sa sceny vyvieła achova. Na niekatory čas ich utrymlivali ŭ słužbovych pamiaškańniach teatra, prapanavaŭšy paprasić prabačeńnia pierad Vieniadziktavym, adnak maładyja ludzi admovilisia.
Paviedamlajecca, što arhanizatary prajekta «Adkrytyja dyjałohi» palicyju vyklikać nie stali. «Interfaksu» heta paćvierdzili ŭ pres-słubie HU MUS pa Pieciarburhu i Lenvobłaści: «Zvarotaŭ, źviazanych ź incydentam u Aleksandrynskim teatry, u palicyju nie pastupała».