Top-7 prykołaŭ z padarožža biełarusa-vandroŭnika, jaki za 5 dzion dabraŭsia da Kitaja aŭtaspynam
Uradženiec Babrujska Andrej Śnihur usiaho z $30 ŭ kišeni maršrutam Minsk-Maskva-Uładzimir-Nižni Noŭharad-Čebaksary-Kazań-Nabiarežnyja Čałny-Ufa-Čelabinsk-Troick-Kastanaj-Astana-Karahanda-Ałma-Ata-Žarkient dasiahnuŭ miažy Kitaja. My źviazalisia z Andrejem pa skajpie, kab raspytać pra jaho ŭražańni ad «telepartacyi» na Uschod.
Andrej Śnihur.
Vyšej ahučany maršrut Andrej skaraje ŭžo treci raz zapar. Padčas debiutu jon straciŭ na darohu amal try tydni, paŭtaryŭ padarožža ŭžo za 5 dzion i 6 hadzin, a ŭ hetym hodzie pastaviŭ asabisty rekord: 4 dni i 22 hadziny ad Minska da Kitaja, amal nie spyniajučysia.
Pieršaja vyłazka ŭ pachod zdaryłasia ŭ žyćci Andreja ŭ 11-hadovym uzroście, ź ciaham času jany stanavilisia ŭsio bolš składanymi, z praciahłymi dystancyjami. Užo ŭ 17 hod pry pieršaj ža mahčymaści chłopiec niaspynna adpraŭlaŭsia łavić mašyny na trasu, naviedaŭšy takim čynam Biełaruś, Rasiju, Ukrainu, Polšču i šmat inšych krain. Ale Kitaj zaŭsiody byŭ jaho asnoŭnaj maraj, jakaja pryvablivała maštabami i mahčymaściami.
«Kažuć, što biełarusy, ruskija i ŭkraincy nie padobnyja, ale, na moj pohlad, my adnaho pola jahady. Ja abjeździŭ krainy hetych troch narodaŭ uzdoŭž i papiarok, ale vialikich adroźnieńniaŭ pamiž nami nie ŭbačyŭ. A voś u miežach adnoj krainy mohuć być kantrasty: tak, na Uschodzie miascovyja značna praściejšyja, čym u Maskvie ci Sankt-Pieciarburhu», — dzielicca nazirańniami Andrej.
Svajaki Andreja spačatku dumali, što jon pavandruje i supakoicca, ale jak tolki jon viartaŭsia z čarhovaha padarožža, pačynaŭ sumavać, siedziačy na miescy, i płanavaŭ nastupnaje. Chłopiec paśpieŭ pastupić i na fizičny fakultet, i na žurfak BDU, ale nivodzin ź ich nie skončyŭ: ciaha da pryhod pieramahała. Rodnym pryjšłosia źmirycca. Ciapier, praŭda, Andrej zatrymaŭsia na ekanamičnym fakultecie BDEU, dzie vučycca zavočna. Ale dla tych, chto zahadzia robić staŭki na toje, što i tut jon nie daviadzie spravu da kanca i ličyć jaho krychu biezadkaznym, «krejzi», u Andreja ŭ zapasie jość žalezny arhumient: «U našaj krainie zaraz, na žal, nie samaja najlepšaja situacyja ŭ płanie mahčymaściaŭ i zarobkaŭ. Trymacca za ŭmoŭnyja 500 rubloŭ bieź pierśpiektyŭ ja nie baču sensu».
U Kitai chłopiec prabudzie ciaham dvuch miesiacaŭ, paralelna praciahvajučy zdymać svoj videabłoh, na jaki robić staŭku jak na budučuju pracu. Paśla płanuje trapić u Vjetnam, Łaos, Tajłand, Indaneziju. Vosieńniu pierad viartańniem u Biełaruś Andrej choča «zaskočyć» u Paŭnočnuju i Paŭdniovuju Kareju.
Voś takim čynam Andrej čaściej za ŭsio zarablaje hrošy.
Pakul heta ŭsio napieradzie, a zaraz Andrej śpiecyjalna dla čytačoŭ «Našaj Nivy» pryhadvaje samyja prykolnyja vypadki i niespadziavanki z vandroŭki i dzielicca hałoŭnymi łajfchakam z tymi, chto taksama maryć pra žyćcio sa smakam aŭtaspynu.
- U pieršy dzień majho padarožža vypaŭ śnieh. Uličvajučy, što zvyčajna 11 maja — soniečny viasnovy dzianiok, mianie heta zusim nie paciešyła. Dalej drennaje nadvorje jašče doŭha nie davała spakoju.
- Trymajučy kurs na Maskvu, ja «zastopiŭ» dvuch chłopcaŭ. Kožny ź ich byŭ na asobnaj mašynie. Adna ź ich złamałasia. Jaje ŭziali na buksir. Niekalki razoŭ tros zryvaŭsia, paśla čaho ja dastaŭ z zaplečnika alpiniscki karabin, i my siak-tak dabralisia da Maskvy. U toj momant ja adčuvaŭ siabie Fileasam Foham.
- Pa darozie da Ufy ŭ adnoj z mašyn u mianie na plačy spaŭ pjany kapitan karabla. U formie i z furažkaj.
- Kali ŭ treciuju noč ja stopiŭ pasiarod kazachskaha stepu, spyniŭsia dalnabojščyk z Babrujska. Uličvajučy, što ja taksama adtul, było vielmi kruta.
- U Kazachstanie try kiroŭcy zapar zabiaśpiečvali mianie tušonkaj. Vyhladała, byccam jany zhavarylisia.
- Dajechaŭšy da kitajskaj miažy za 4 dni i 10 hadzin, ja ŭpiorsia ŭ začynienuju miažu. Spaźniŭsia litaralna na 5 chvilin! Było vielmi kryŭdna.
- Dniami ŭ kitajskim Čendu z dapamohaj hrańnia na hitary ja zarabiŭ $40. Amal $15 u mianie adrazu ž skrali ŭ chostele.
U padarožžach chapaje niebiaśpiek i niepryjemnaściaŭ, adnak toje ž samaje moža napatkać nas i ŭ zvyčajnym žyćci, tamu nie varta bajacca novaha, miarkuje chłopiec. Ludzi lubiać zamiežnikaŭ i padtrymlivajuć ich, takim čynam, mahčyma, kampiensujučy svaje płany, što nie spraŭdzilisia.
Sačyć za dalejšymi pryhodami Andreja možna na jaho kanale.