Jarmošyna admoviłasia abmiarkoŭvać źmieny ŭ vybarčaje zakanadaŭstva z Kanapackaj
Pracoŭnaja hrupa na čale z deputatam parłamientu ad Abjadnanaj hramadzianskaj partyi Hannaj Kanapackaj vyznačyłasia ź nieabchodnymi na ich pohlad źmienami vybarčaha zakanadaŭstva. Prapanovy pradstaviać dla abmierkavańnia ekśpiertam padčas dyskusii «Vybary jak umova pazityŭnych pieramien», jakaja projdzie 25 traŭnia.
«Ich try: abaviazkovaje pradstaŭnictva va ŭčastkovych vybarčych kamisijach pradstaŭnikoŭ kandydataŭ u deputaty, dakładnaja rehłamientacyja pracesu daterminovaha hałasavańnia i adkryty i zrazumieły padlik hałasoŭ. Hetyja źmieny byli pradstaŭlenyja dla razhladu Mižviedamasnaj ekśpiertnaj pracoŭnaj hrupie pry Centrvybarkamie. A zaraz my zaprasili ekśpierta ź Vialikabrytanii, parłamientaryjaŭ ź Litvy i Ukrainy dla taho, kab abmierkavać, nakolki mahčymaja implemientacyja hetych prapanoŭ pracoŭnaj hrupy i nakolki siońnia hatovyja ŭłady iści na źmieny vybarčaha pracesu», — kaža Kanapackaja.
Paŭdzielničać u dyskusii arhanizatary prapanavali i staršyni Centrvybarkamu Lidzii Jarmošynaj. Ale taja admoviłasia na padstavie taho, što pradstaŭniki CVK prymajuć udzieł u abmierkavańni prapanovaŭ pa źmienie vybarčaha zakanadaŭstva ŭ adpaviednaści z daručeńniami kiraŭnika dziaržavy jak subjekta prava zakanadaŭčaj inicyjatyvy. «Pakolki takoje daručeńnie adsutničaje, naš udzieł u zhadanym mierapryjemstvie padajecca niemahčymym», — kanstatuje čynoŭnica ŭ aficyjnym adkazie.
Taksama, kaža Kanapackaja, zaprašeńnie atrymali deputaty parłamientu. I nibyta śpiarša vykazali zacikaŭlenaść va ŭdziele. Ale potym pačali admaŭlacca pa roznych pryčynach. Napiaredadni mierapryjemstva Kanapackaja zajaviła Jeŭraradyjo, što nie ździvicca, kali nikoha z narodnych abrańnikaŭ aproč jaje na dyskusii nie budzie.