Biełaruskija navukoŭcy raspracoŭvajuć mietad dyjahnostyki zachvorvańniaŭ pa kropli kryvi
Biełaruskija navukoŭcy raspracavali materyjał, jaki dazvalaje vyjaŭlać rečyvy ŭ vielmi nizkich kancentracyjach. Ich raspracoŭka moža być karysnaja ŭ samych roznych śfierach — ad pošuku złačyncaŭ da pastanoŭki dyjahnazaŭ, piša Tut.by.
Hanna Bandarenka
Na praciahu niekalkich apošnich hadoŭ biełaruskija navukoŭcy vyrablajuć pa ŭłasnaj technałohii asablivyja padkładki — raschodny materyjał dla chimičnaha analizu. Hetym zajmajucca śpiecyjalisty z BDUIR sumiesna z kalehami ź Instytuta fiziki imia Ściapanava NAN Biełarusi.
Na takuju padkładku źmiaščajuć kroplu rastvoru i z dapamohaj śpiektromietra detektujuć i vyvučajuć malekuły, jakija ŭvachodziać u jaho skład. Asablivaści materyjału dazvalajuć rabić heta ź niejmavierna vysokaj dakładnaściu.
«Vy možacie detektavać mnohija rečyvy ŭ vielmi nizkich kancentracyjach, — tłumačyć kandydat techničnych navuk Hanna Bandarenka, adzin z aŭtaraŭ raspracoŭki. — Heta dazvalaje pravodzić analiz z dakładnaściu, jakoj niemahčyma dasiahnuć z vykarystańniem inšych mietadaŭ».
U asnovie padkładki — kremnijevaja płaścina z płastom nanastrukturavanaha materyjału pad nazvaj porysty kremnij. Źvierchu asadžvajucca nanačaścicy srebra abo zołata.
«Sam analiz pravodzicca dosyć chutka. U pryncypie jon pravodzicca na praciahu 30 siekund — chviliny. Padrychtoŭka ŭzoru i naniasieńnie na padkładku — uvieś kompleks zajmaje try hadziny maksimum».
Vykarystoŭvać taki mietad možna ŭ roznych halinach — naprykład, u kryminalistycy abo miedycynie. U teoryi takija padkładki možna vykarystoŭvać dla dyjahnostyki ankałahičnych zachvorvańniaŭ. Ciapier BDUIR i Instytut fizijałohii NANB pry dapamozie raspracavanych padkładak pravodziać daśledavańni, źviazanyja z dyjahnostykaj kołarektalnaha raku.
«U Biełarusi pakul padobnyja padkładki nie vykarystoŭvajucca ŭ kliničnaj praktycy. Heta źviazana ź nieabchodnaściu adpracoŭki mietodyki ich prymianieńnia, — raspaviadaje Hanna. — Ale za miažoj takim sposabam užo daśledujuć syrovatku kryvi. Syrovatka zdarovaha čałavieka maje inšy śpiektr u paraŭnańni z syrovatkaj čałavieka, u jakoha jość zachvorvańnie».
Zychodziačy z dośviedu zamiežnych kaleh, ukaranieńnie hetaha mietadu maje vialikija pierśpiektyvy. Ale vielmi važna pravieści ceły kompleks daśledavańniaŭ dla realizacyi jaho praktyčnaha prymianieńnia, u jakich treba suładnaje ŭzajemadziejańnie mnohich arhanizacyj.
Pa słovach navukoŭcaŭ, u inšych krainach taki mietad šyroka raspaŭsiudžany. Adnak padkładki biełaruskaj vytvorčaści kaštujuć tańniej. Niuansy vytvorčaści daśledčyki trymajuć u sakrecie, kab zachavać cikavaść da svajho praduktu. Ciapier cikavaść da raspracoŭki prajaŭlajuć arhanizacyi z Rasii, krain Jeŭrasajuza i ZŠA.
«Za miažoj košt hetych padkładak składaje ad 15 da 75 jeŭra. U nas košt adnoj padkładki dla zamiežnych zakazčykaŭ varjirujecca ad 5 da 30 jeŭra. 5—7 jeŭra kaštuje padkładka na asnovie srebra i kala 30 jeŭra kaštuje padkładka na asnovie zołata».
U śniežni minułaha hoda artykuł ab raspracoŭcy biełaruskich daślednikaŭ apublikavali ŭ prestyžnym navukovym časopisie Nanoscale Research Letters. U hetym červieni navukoŭcy prademanstrujuć svaju raspracoŭku na vystavie eMerge Americas ŭ Majami ŭ ZŠA, a ŭ lipieni vyniki daśledavańnia prezientujuć u Partuhalii — na pajezdku tudy jany vyjhrali hrant.