U Hłusku ŭ nastaŭnika kanflikt ź milicyjaj
Małady hłuski nastaŭnik miarkuje, što jamu pačali pomścić milicyjanty — nibyta navat sprabavali padkinuć ałkahol, kab abvinavacić u raśpićci na pracoŭnym miescy.
Uładzimir Babak.
Uładzimir Babak viadzie zaniatki ŭ Hłusku pa prykładnym mastactvie dla dziaciej. Na hetuju pracu jon patrapiŭ pa raźmierkavańni paśla zakančeńnia Akademii mastactvaŭ.
Uletku padčas adpačynku nastaŭnik zajmaŭsia zboram jahad i hryboŭ dla Hłuskaha rajonnaha spažyvieckaha tavarystva, a taksama byŭ śviedkam pa narychtoŭcy (čałaviek, adkazny za źvierku dadzienych pa zdačach i vypłatach).
U lutym, prahladajučy dakumienty pa narychtoŭcy za minuły hod, Babak zaŭvažyŭ naŭmysnyja zavyšeńni i zanižeńni ŭ dadzienych. A taksama toje, što z usich papieraŭ tolki na troch staić jaho sapraŭdny podpis, a na astatnich podpis padrobleny.
Pra svaju «znachodku» nastaŭnik paviedamiŭ u UBEZ. Śledčy Mukasiej parušeńniaŭ nie vyjaviŭ, a voś Babak patrapiŭ u niałasku.
Incydent adbyŭsia 31 maja padčas zaniatkaŭ dla daškolnikaŭ. Pryjšło ŭsiaho dvoje dzietak, bo navučalny hod faktyčna skončyŭsia. Hetaja hrupa źbirajecca pa viečarach u pamiaškańni biblijateki Hłuskaha kaledža mastactvaŭ.
«Kala pałovy na siomuju da mianie ŭ kabiniet uvarvaŭsia były hałoŭny ŭčastkovy Hłuska Jahor Rudnik, jaki zajmajecca baraćboj z narkotykami. Jon byŭ u cyvilnym i trymaŭ pustuju butelku piva ŭ ruce, jakuju pastaviŭ na moj stoł. Dzieci byli ŭ šoku, a ja spytaŭ, što jon robić. Zamiest adkaza Rudnik zakryčaŭ: «Ty pješ! Što ty sabie dazvalaješ?!» Paśla čaho milicyjant pasprabavaŭ vyciahnuć mianie z-za stała. Dzieci pierapužalisia i vyskačyli biez abutku na vulicu», — raskazvaje nastaŭnik.
Babak pasprabavaŭ paklikać na dapamohu, ale Rudnik nie davaŭ vyjści z kabinieta i namahaŭsia załamać nastaŭniku ruki. Na kryki prybiehli niekalki supracoŭnikaŭ biblijateki, jakija zrabili nievialikaje videa incydentu. Nieŭzabavie zatrymlivać nastaŭnika pryjšoŭ druhi supracoŭnik. Babak śćviardžaje, što jaho šturchali pa pamiaškańni, vykručvali ruki i stavili da ściany.
U vyniku Uładzimira Babak zavieźli ŭ balnicu, kab pravieryć na najaŭnaść ałkaholu ŭ kryvi. Pracedura pakazała «0». Paśla čaho nastaŭnika jašče zavieźli ŭ miascovy RUUS, a potym vyzvalili.
«Na raźvitańnie Rudnik z kalehami skazali, što mnie ŭ Hłusku žyćcia nie budzie. Maŭlaŭ, kolki b ja ni skardziŭsia, navat kali źviarnusia ŭ Mahiloŭ, tam prymuć pravilnaje rašeńnie, a ŭ Minsk raźbiracca z takoj spravaj nie buduć. Vyhladaje, što hetyja pamyłki i podpisy ŭ dakumientach nie vypadkovyja, u horadzie dziejničajuć machlary, jakija abaraniajuć adzin adnaho. Ale ja budu skardzicca dalej i pastarajusia dabicca spraviadlivaści. Adno, troški strašna, što moža zdarycca nastupnym razam. Rudnik pracuje va ŭstanovie, jakaja zajmajecca narkotykami. Strašna, što mohuć niešta padkinuć, jak hetuju butelku piva, i ničoha nie dakažaš potym», — padsumavaŭ vypadak Uładzimir Babak.
Videa zatrymańnia Babak vykłaŭ u sieciva na ŭłasnuju staronku ŭ «Adnakłaśniki». Pad dopisam Rudnik pakinuŭ kamientar, što ŭ horadzie ŭsio vyrašaje jon. Pakul nastaŭnik źbirajecca nakiravać skarhi ŭ Śledčy kamitet i prakuraturu.