Siabroŭka Dźmitryja Šyrakapytava: «Časam jon kazaŭ, što apuskajucca ruki, ale pra samahubstva nie zaikaŭsia nikoli»
Maryna Azaronak šmat hadoŭ viedała Dźmitryja Šyrakapytava, jakoha 12 červienia znajšli paviešanym, apošnija paŭhoda jany dastatkova ščylna kamunikavali, stelefanoŭvalisia amal kožny dzień.
Dźmitryj Šyrakapytaŭ. Fota redakcyi pradastaviŭ Siarhiej Marcaleŭ.
«U kancy 90-ch — pačatku 2000-ch Dźmitryj byŭ aktyŭnym siabram «Biełaha lehijona», potym uvajšoŭ u šerah «Maładoj Hramady». Byŭ skarbnikam «Maładych sacyjał-demakrataŭ», arhanizacyi ŭtvoranaj pry partyi Mikałaja Statkieviča. Jon vielmi baluča ŭsprymaŭ usio toje, što adbyvałasia ŭ krainie», — raskazvaje Maryna Azaronak.
«Dzima byŭ vielmi pazityŭnym chłopcam. Razumiejecie, kahości žyćcio bje mocna, kahości — mieniej. Dzimu, na moj pohlad, pabiła mocna. Byvała kazaŭ, što apuskajucca ruki, ale nikoli ničoha nie havaryŭ pra samahubstva. Jon vielmi enierhietyčna dobry čałaviek», — praciahvaje Maryna.
Dźmitryj Šyrakapytaŭ u halštuku. Fota redakcyi pradastaviŭ Siarhiej Marcaleŭ.
Apošnim časam jon zarehistravaŭsia jak indyvidualny pradprymalnik. Akazvaŭ pasłuhi pa kampjutarnych naładkach, sistemnym administravańni. «Napracoŭvaŭ bazu klijentaŭ. Ja jašče žartavała, što stanie miljanieram», — uspaminaje spn.Azaronak.
Nie tak daŭno Dźmitryj Šyrakapytaŭ raźvioŭsia z žonkaj. Siarhiej Marcaleŭ u kamientach u fejsbuku paviedamlaje, što heta byŭ dastatkova ciažki momant u bijahrafii Dźmitryja. Byłaja žonka adsudziła ŭ jaho majomaść. U Šyrakapytava zastalisia dzieci.
Maci Dźmitryja Šyrakapytava — kandydat mastactvaznaŭstva, mastačka Ludmiła Nalivajka. Daśledčyca tvorčaści biełaruska-finskaha mastaka Achoła-Vało. A voś baćki ŭžo niama ŭ žyvych. Dźmitryj naradziŭsia i žyŭ u Minsku, jamu było 36 hadoŭ.
U sakaviku byli zatrymańni pa tak zvanaj spravie «Biełaha lehijona». Maryna Azaronak kaža, što nie čuła, kab Šyrakapytava vyklikali pa dopyty, ci kudyści jašče pa hetaj spravie. «Ale jon vielmi baluča ŭsprymaŭ situacyju. Aryštavanyja ludzi — jahonyja siabry, jon ich viedaŭ. Dzima dobra padtrymlivaŭ adnosiny ź Mirasłavam Łazoŭskim».