Dolščyca padała ŭ sud na zabudoŭščyka, jaki choča ŭziać $ 6 tysiač za nišy za batarejami
Historyja dolščykaŭ, jakija kupili kvatery ŭ mansardnym paviersie doma № 25 na vulicy Janki Maŭra, doŭžycca z 2013 hoda. Tady Alaksandra i jaje stryječnaja siastra Anastasija zaklučyli dahavory z UP «Biełair», jakoje rabiła rekanstrukcyju piacipaviarchoŭki z kapramontam i nadbudovaj mansard, na dvuchuzroŭnievyja kvatery. Całkam ich apłacili, ale da hetaha času nie mohuć atrymać klučy ad svajho žylla.
Pa tysiačy dalaraŭ za kvadratny mietr niš za batarejami
Kali kvatery byli hatovyja, zabudoŭščyk, jak i naležyć, zrabiŭ kantrolny zamier. Amal va ŭsich dolščykaŭ płošča žylla akazałasia trochi bolšaj za tuju, za jakuju ŭnosili hrošy.
U Alaksandry, naprykład, kvatera «vyrasła» na 6,1 kvadratnaha mietra, u Anastasii - na 7,8. I ŭsio b ničoha, ale «znajšlisia» hetyja mietry… u nišach za batarejami, jakich u pieršapačatkovym prajekcie nie było. Za kožny dadatkovy «kvadrat» bieskarysnaj płoščy treba było zapłacić 1 tysiaču dalaraŭ. Chtości z dolščykaŭ zapłaciŭ adrazu i zajechaŭ u svaje kvatery, Alaksandra i jaje siastra płacić nie stali i padali na zabudoŭščyka ŭ sud.
Za nišy za batarejami dolščykam daviałosia zapłacić jak za žyłuju płošču.
Sud z zabudoŭščykam žančyny prajhrali. Ale zvaroty ŭ roznyja instancyi dali svoj vynik: Ministerstva architektury i Dziaržbudekśpiertyza vyvučyli dakumienty i zrabili vysnovu, što płošča niš nie pavinna ŭličvacca ŭ ahulnaj płoščy pamiaškańnia. Alaksandra razam ź inšymi dolščykami nakiravała zvarot u RUP «Minskaje haradskoje ahienctva pa dziaržaŭnaj rehistracyi i ziamielnym kadastry» (BRTI), kab śpiecyjalisty pieraličyli płošču kvater.
- Tam my atrymali nieabhruntavanuju admovu, tamu padali na BRTI ŭ sud, - kaža Alaksandra. - Ministerstva architektury i budaŭnictva i RUP «Budtechnorm» dakładna ŭstanavili, što nišy ŭ kvatery źjaŭlajucca nišami dla inžyniernaha abstalavańnia. Na padstavie lista Minbudarchitektury Nacyjanalnaje kadastravaje ahienctva nakiravała ŭ BRTI rekamiendacyjny list, što dadzienyja nišy źjaŭlajucca nišami dla inžyniernaha abstalavańnia i ich płošča nie pavinna ŭličvacca ŭ płoščy pamiaškańnia.
Na čarhovym pasiadžeńni sud pryznaŭ techpašpart z pavialičanaj płoščaj, vydadzieny BRTI, niesapraŭdnym. Tamu BRTI jašče raz zrabiła abmier kvatery i vydała dolščykam novyja techničnyja pašparty.
— Na praciahu hoda my dakazvali vidavočnaje BRTI: što radyjatary adnosiacca da termina «inžyniernaje abstalavańnie». Heta prosta absurd — dakazvać, što biełaje heta ŭsio ž taki biełaje, a nie čornaje, — raspaviadaje Alaksandra.
Płošča kvatery pa novym techpašparcie pamienšyłasia na 6,1 kvadratnaha mietra, to bok nišy, jak i naležyć, nie ŭličyli ŭ ahulnuju płošču. Ale zarehistravać svajo žyllo Alaksandra ŭsio roŭna nie moža.
- U mianie na rukach novy techničny pašpart na kvateru z płoščaj 66,5 mietra, heta značyć mienš, čym taja, za jakuju ja zapłaciła, na 6,1 kvadratnaha mietra. Ale ŭ daviedcy ad zabudoŭščyka paznačana, što ja apłaciła pamiaškańnie płoščaj 72,6 mietra. Zabudoŭščyk vydavać novuju daviedku nie žadaje, a z-za niesupadzieńnia płoščaŭ u dvuch dakumientach u BRTI rehistravać maju kvateru i prava ŭłasnaści na kvateru admaŭlajucca, - kaža Alaksandra. - Ja dva hady nie mahu ŭjechać u svaju apłačanuju kvateru.
«Raz užo zapłacili za hetyja nišy, budziem vykarystoŭvać jak palicy»
Tyja dolščyki, jakija adrazu zapłacili za dadatkovyja mietry ŭ nišach, raspaviadajuć, što vykarystoŭvać ich jak paŭnavartasnuju płošču nielha. Ale varyjanty jość.
Dom № 25 na Janki Maŭra.
- Nam treba było chutka zasialicca, my žyli ŭ arendnym žylli, tamu ŭžo hatovyja byli dapłacić za dadatkovuju płošču. Vyjšła niešta kala 5 mietraŭ, - kaža adzin z žycharoŭ doma, Andrej. - Pakul my hetuju nišu nijak nie vykarystoŭvajem, ale jość płany zrabić tam vysoŭnyja abo raspašnyja palicy i zachoŭvać tam zimovuju vopratku abo instrumient. Choć, viadoma, nazvać heta paŭnavartasnym miescam dla vykarystańnia nielha. Tym bolš, kali za jaho biaruć hrošy.
Niekatoryja dolščyki, jakija zapłacili za kvatery i atrymali klučy, ździŭlajucca da hetaha času: jak možna było źmianić prajekt i addać ludziam kvatery bolšaj płoščy, jakuju nielha vykarystoŭvać.
- Kvatery naohuł pabudavanyja aby-jak: pad voknami zamiest narmalnaha ŭciaplalnika zasunuli śmiećcie, pareštki. Pryjšłosia ŭsio samim pierarablać, - kaža ŭładalnik adnoj z kvater, Dzianis. - A ź nišami hetymi ciapier nie viedajem, što rabić. Pa pačatkovym prajekcie jany ž nie ŭvachodzili ŭ ahulnuju płošču, potym ich ŭklučyli i ŭziali z nas za heta hrošy. Jak zaŭsiody, pakutuje zvyčajny dolščyk.
Zabudoŭščyk: Novy techpašpart na kvateru nie maje siły
U UP «Biełair» tłumačać, što źmianieńnie techpašparta na kvateru nie maje nijakaha sensu, kali ŭ techpašparcie na abjekt zastalisia raniejšyja dadzienyja. U BRTI kažuć, što novy pašpart na abjekt, u jakim płošča dvuch kvater, za jakija sudzilisia, pamienšanaja, daŭno hatovy. Adnak zabudoŭščyk płanuje kiravacca pieršapačatkovym pašpartam.
- BRTI spačatku daŭ adzin techpašpart na abjekt, potym inšy. Chaj jany zaraz z dolščykami i raźbirajucca, raz nie mohuć zrabić pracu adzin raz, - kamientuje kiraŭnik UP «Biełair» Arkadź Kalinoŭski. - U mianie jość dziejučy dakumient, z podpisami i piačatkami. Ja na padstavie jaho i dziejničaju. Kali dolščyki atrymali techpašpart, jany mohuć pryjechać da mianie i atrymać klučy ad kvatery. Mnie ŭ pryncypie niecikava, supadajuć tam płoščy ci nie. Ja vydaŭ im daviedku dla BRTI, jany ź joj pajechali tudy i atrymali techpašpart. Hałoŭnaja ŭmova dla vydačy klučoŭ - najaŭnaść techpašparta. Kali jon u ich jość, jany mohuć pryjechać u luby momant i atrymać klučy ad svaich kvater. Chaj pryjazdžajuć, zabirajuć klučy, a potym raźbirajucca z BRTI: šmat im mietraŭ, mała mietraŭ. Jakija pytańni mohuć być da zabudoŭščyka ciapier? Usie našy dolščyki atrymali techpašparty, ni ŭ koha nijakich prablem nie było.
Ale Alaksandra pa zakonie zabrać klučy ŭ zabudoŭščyka nie moža.
- U adpaviednaści z zakanadaŭstvam i damovaj jość dakładny paradak: spačatku ja pavinna zarehistravać prava ŭłasnaści na kvateru, a ŭžo potym atrymać klučy i zajechać. Aformić prava ŭłasnaści ja nie mahu z-za roznych płoščaŭ kvatery ŭ dakumientach, - tłumačyć dziaŭčyna. - Na siońniašni dzień u mianie adzin varyjant - iznoŭ padavać u sud na zabudoŭščyka, kab prymusić jaho vydać dakumienty, nieabchodnyja dla afarmleńnia prava ŭłasnaści ŭ adpaviednaści z novym dziejučym techničnym pašpartam. A novy sud - heta znoŭ čas, heta znoŭ vializnyja niepasilnyja sumy hrošaj, znoŭ daŭhi.