Ładućka padaŭ zajavu na bankructva «Motavieła»
U Ekanamičny sud Minska nakiravanaja zajava ab pryznańni AAT «Motavieła» ekanamična niepłaciežazdolnym (bankrutam). Dakumient padpisaŭ hiendyrektar motaviełazavoda Mikałaj Ładućka.
Daŭžnik pracuje sa stratami, niepłaciežazdolnaść nabyvaje ŭstojlivy charaktar, hrašovyja pastupleńni nie dazvalajuć va ŭstanoŭlenyja terminy vykonvać płaciežnyja abaviazacielstvy i abaviazacielstvy, jakija vynikajuć z pracoŭnych i źviazanych z imi adnosin», havorycca ŭ zajavie.
Pavodle dadzienych buchhałtarskaha bałansu pa stanie na 30 krasavika, košt aktyvaŭ «Motavieła» składaje 60 młn rubloŭ. Straty za I kvartał skłali amal 350 tys. rubloŭ. Straty za 2016 hod - 7,5 młn rubloŭ.
Asnoŭnymi pryčynami kiepskaha finansavaha stanovišča pradpryjemstva źjaŭlajecca «naličeńnie pracentaŭ pa kredytach i kursavych roźnicach ad pieraličeńnia abaviazacielstvaŭ, vyražanych u zamiežnaj valucie, a taksama deficyt abarotnych srodkaŭ, jaki pieraškadžaje naroščvańniu abjomaŭ vytvorčaści». Straty taksama pavialičvajucca za košt utrymańnia niaprofilnych aktyvaŭ (dapamožnaj haspadarki, dziciačaha azdaraŭlenčaha łahiera, kompleksu internataŭ).
«Motavieła» maje daŭhi pierad 7 bankami, u tym liku ŭ 6-ci — zakłady i paručycielstvy pa abaviazacielstvach 3-ich asobaŭ. Ułasnyja abaviazacielstvy - u adnym banku na ahulnuju sumu 28,2 młn dalaraŭ. U zakładzie ŭ bankaŭ znachodzicca nieruchomaść zavoda acenačnym koštam amal 88 młn dalaraŭ, havorycca ŭ dakumiencie.
Suma patrabavańniaŭ kredytoraŭ pa abaviazacielstvach, zabiaśpiečanych zakładam majomasci «Motavieła», składaje 61,3 młn dalaraŭ (187% koštu aktyvaŭ), pa hrašovych abaviazacielstvach, nieasprečvanaja daŭžnikom - 59,3 młn rubloŭ, vynikaje z zajavy.
U vytvorčaści Ekanamičnaha suda znachodziacca patrabavańni «Biełhazprambanka» (na sumu amal 9 młn dalaraŭ), łatvijskaha «Ryjetumu Banka» (7.138.000 jeŭra) i «Biełarusbanka» (1,9 młn dalaraŭ).
Akramia daŭhoŭ pierad bankami «Motavieła» maje abaviazacielstvy pierad biudžetam i supracoŭnikami ŭ ahulnaj składanaści na 700 tys. rubloŭ.
Debitorskaja zapazyčanaść «Motavieła» składaje amal 16 młn rubloŭ. Adnak istotnuju častku debitorskaj zapazyčanaści składajuć debitory, jakija znachodziacca ŭ pracesie likvidacyi.
Jak vynikaje z zajavy, 99,88% akcyj «Motavieła» ŭžo naležyć Dziaržkamitetu pa majomaści. Heta adbyłosia paśla taho, jak u studzieni 2017 hoda asnoŭny ŭładalnik kampanii Alaksandr Muraŭjoŭ byŭ pryhavorany da 11 hadoŭ pazbaŭleńnia voli, a jaho kantrolny pakiet akcyj u «Motavieła» byŭ kanfiskavany na karyść dziaržavy.
Niekalki tydniaŭ tamu ŭłady Minska nakiravali va ŭrad prapanovy pa raźvićci motaviełazavoda. U pryvatnaści, prapanoŭvałasia zbankrutavać AAT «Motavieła» i pradavać ŭčastak na Partyzanskim praśpiekcie na aŭkcyjonie adzinym łotam. Novaja vytvorčaść matacykletnaj i viełasipiednaj techniki płanujecca naładzić u kitajska-biełaruskim industryjalnym parku «Vialiki kamień», što funkcyjanuje ŭ režymie svabodnaj ekanamičnaj zony.