Ukraina padała apielacyju ŭ sud Łondana pa spravie ab $3 miljardach doŭhu pierad Rasijaj
Ministerstva finansaŭ Ukrainy siońnia padało ŭ anhlijski Apielacyjny sud nieabchodnyja dakumienty dla abskardžańnia rašeńnia Vysokaha suda Łondana ad 29 sakavika ab paskoranym razhladzie pazovu Rasii suprać Ukrainy pa jeŭraablihacyjach na 3 młrd dalaraŭ ZŠA, piša UNIAN.
Jak paviedamlajecca na sajcie Ministerstva finansaŭ, Ukraina ŭpeŭnienaja ŭ arhumientach apielacyi i ŭ vyjhryšy ŭ Apielacyjnym sudzie ŭ adpaviedny termin.
«Słuchańni apielacyi papiarednie pryznačanyja na druhuju pałovu studzienia 2018 hoda», — adznačajecca ŭ paviedamleńni.
29 sakavika Łondanski sud uchvaliŭ paskorany razhlad pazovu Rasii suprać Ukrainy «doŭhu Janukoviča» ŭ 3 miljardy dalaraŭ, nie pryznaŭšy abhruntavanaść arhumientaŭ Ukrainy ŭ hetaj spravie. Pry hetym sud uchvaliŭ padaču Ukrainaj apielacyi na rašeńnie suda, a taksama časova zamaroziŭ lubyja dziejańni pa spahnańni doŭhu.
Vysoki sud Łondana 19 studzienia zaviaršyŭ trochdzionnyja słuchańni pa pazovie Rasii da Ukrainy pa kredycie ŭ 3 miljardy dalaraŭ, atrymanaha krainaj u śniežni 2013 hoda pa damoŭlenaści pamiž prezidentam RF Uładzimiram Pucinym i tahačasnym prezidentam Ukrainy Viktaram Janukovičam. Ukraina ličyć hety kredyt «chabaram» Kramla byłoj ukrainskaj uładzie za admovu ad jeŭraintehracyi, tady jak rasijski bok nastojvaje na jaho pahašeńni.