Raspracoŭščyki Telegram dadali naładku dla abychodu mahčymaha błakavańnia
Raspracoŭščyki miesiendžara Telegram dadali ŭ jaho nieabchodnuju dla abychodu błakavańnia naładku. Jana ŭžo źjaviłasia ŭ karystalnikaŭ dadatka na kampjutarach, raspracoŭščyki płanujuť dadać jaje ŭ mabilnyja viersii ŭ najbližejšy čas, paviedamlaje rbc.ru.
Fota: Siarhiej Kańkoŭ / TASS
Raspracoŭščyki miesiendžara Telegram dadali mahčymaść złučacca z proksi-siervierami pa pratakole SOCKS5. Novaja opcyja dastupnaja dla karystalnikaŭ dadatka Telegram Desktop dla Windows i dla Mac. Jana dazvolić karystacca miesiendžaram navat u vypadku jaho błakavańnia. Pra heta raspracoŭščyki Telegram prainfarmavali ŭ paviedamleńniach na ŭłasnaj płatformie dla publikacyi tekstaŭ Telegraph.
«U płanach Raskamnahlada (i nie tolki) zładzić armahiedon dla rasijskich karystalnikaŭ Telegram. Kamanda miesiendžara praduhledžvała takoje rašeńnie i ŭklučyła ŭ funkcyjanał padtrymku złučeńnia z proksi-siervierami na asnovie pratakołu SOCKS5», — havorycca ŭ paviedamleńni.
Karystalnikam rajać pamianiać nałady jak maha chutčej, bo kali Telegram budzie zabłakavany, to z rasiejskich viersij kramaŭ dadatku Google Play i AppStore, pa zajavach raspracoŭščykaŭ, «klijenty Telegram, chutčej za ŭsio, źniknuć».
Sietkavy pratakoł SOCKS dazvalaje karystalnikam padklučacca da kančatkovaha sierviera praz proksi-siervier, heta značyć usie zapyty ad klijenta prachodziać praz hety siervier-pasiarednik. Kali hety siervier raźmieščany za miežami krainy, ułady nie mohuć adsačyć, na jakija sietkavyja resursy iduć zapyty ad jaho.
23 červienia kiraŭnik Raskamnahlada Alaksandr Žaraŭ papiaredziŭ administracyju i karystalnikaŭ Telegram ab jaho mahčymym błakavańni ŭ Rasii praz toje, što Telegram nie padaje dadzienyja, patrebnyja dla rehistracyi miesiendžara ŭ rejestry arhanizataraŭ raspaŭsiudžvańnia infarmacyi (zakon patrabuje rehistravacca ŭ takim rejestry z 1 studzienia 2017 hoda). Zasnavalnik Telegram Pavieł Duraŭ admoviŭsia heta rabić. Paźniej Žaraŭ zajaviŭ, što Duraŭ zajmaje niejtralnuju pazicyju «ŭ dačynieńni da terarystaŭ i złačyncaŭ», jakija karystajucca Telegram.