U Vieniesuele viertalot abstralaŭ budynak Viarchoŭnaha suda
Prezident Vieniesueły Nikałas Madura zajaviŭ, što budynak Viarchoŭnaha suda krainy ŭ Karakasie abstralali ź viertalota. Madura nazvaŭ zdareńnie terarystyčnym napadam, zaklikanym destabilizavać situacyju ŭ krainie.
Incydent z abstrełam Viarchoŭnaha suda adbyŭsia, kali Madura vystupaŭ u žyvym efiry pa dziaržaŭnym telebačańni.
Prezident raskazaŭ, što viertalot abstralaŭ budynak suda ŭ stalicy krainy i zapuściŭ dźvie hranaty, adna ź jakich nie ŭzarvałasia. Madura paviedamiŭ, što pa tryvozie padniali siły supraćpavietranaj abarony.
Jon dadaŭ, što śpiecpadraździaleńni siłavych struktur šukajuć arhanizataraŭ i ŭdzielnikaŭ abstrełu.
«Adzin ź piłotaŭ raniej byŭ piłotam Mihiela Radryhiesa Toresa, byłoha ministra [ŭnutranych spraŭ], jaki znachodzicca ŭ kantakcie z CRU», — skazaŭ Madura. Jon vykazaŭ nadzieju, što apazicyja asudzić hetuju ataku. «Akcyja mahła pryvieści da sotniaŭ paranienych», — adznačyŭ prezident.
Viertalot naležaŭ korpusu navukovych, kryminalnych i kryminalistyčnych rasśledavańniaŭ palicyi Vieniesueły (CICPC), paviedamiŭ ministr suviazi i infarmacyi Ernesta Viljehas. «Adzin čałaviek padniaŭ zbroju suprać respubliki. Jon vykraŭ viertalot i atakavaŭ Viarchoŭny sud», — pryvodzić kanał NTN 24 słovy Viljehasa.
Pa sacyjalnych sietkach razyšlisia fatahrafii viertalota ŭ liŭrei CICPC, z borta jakoha vyviešany płakat z nadpisam «350. Libertad» («350. Svaboda»). U artykule 350 kanstytucyi Vieniesueły havorycca pra mahčymaść niepryznańnia hramadzianami ŭłady, kali jana parušaje demakratyčnyja kaštoŭnaści i pravy čałavieka.
Miascovyja ŚMI adznačajuć, što piłotam viertalota moh być aficer CICPC Oskar Pieres. U sacyjalnych sietkach apublikavany jaho videazvarot. «My — kaalicyja vajskoŭcaŭ, palicyjantaŭ i cyvilnych čynoŭnikaŭ u pošuku bałansu i suprać niedaŭhaviečnaha złačynnaha ŭrada», — kaža piłot na videa.