Minskija milicyjanty hadzinu ŭhavorvali rabaŭnika-niaŭdačnika nie skančvać žyćcio samahubstvam
27 červienia pryblizna ŭ 21 hadzinu 20 chvilin kala doma pa vuł. Uschodniaja da narada Savieckaha (h.Minska) adździeła departamienta achovy MUS źviarnuŭsia 47-hadovy minčanin, jaki paviedamiŭ, što na jaho napaŭ nieviadomy, paviedamlaje pres-słužba HUUS Minharvykankama.
Paciarpieły raspavioŭ, što kala doma pa vuł. Kachoŭskaj jon spyniŭsia, kab padvieźci mužčynu. Pasažyr paprasiŭ davieźci jaho da adnaho z damoŭ pa vuł. Uschodniaja. Na padjeździe da patrebnaha adrasa pasažyr dastaŭ z kišeni pradmiet, źniešnie padobny na pistalet, i zapatrabavaŭ u kiroŭcy hrošy. Haspadar aŭto nie razhubiŭsia, vybieh z mašyny i pačaŭ uciakać ad złamyśnika. Toj jaho pieraśledvaŭ. Na ščaście, na šlachu kiroŭcy akazaŭsia narad achovy. Pabačyŭšy milicyjantaŭ, praśledavalnik źbieh u adzin z padjezdaŭ žyłoha doma.
Akazałasia, što kvatera, u jakoj schavaŭsia napadnik, naležyć jaho sastarełaj maci. Susiedzi paviedamili pravaachoŭnikam, što mužčyna złoŭžyvaje śpirtnymi napojami i nie raz parušaŭ hramadski paradak.
Asobu napadnika vyśvietlili chutka — im akazaŭsia 49-hadovy niepracujučy raniej nieadnarazova sudzimy za ŭčynieńnie złačynstvaŭ ekanamičnaj skiravanaści, a taksama za kiravańnie transpartnym srodkam u stanie ałkaholnaha apjanieńnia žychar Minskaha rajona.
Zamknuŭšysia ŭ kvatery, złamyśnik admaŭlaŭsia adčyniać dźviery milicyjantam i zapatrabavaŭ pryvieźci da jaho znajomuju pa imieni Julija. A ŭ vypadku šturmu pahražaŭ skončyć žyćcio samahubstvam pry dapamozie pistaleta.
Na miesca zdareńnia nieadkładna vybyŭ namieśnik načalnika ŭpraŭleńnia kryminalnaha vyšuku HUUS Minharvykankama padpałkoŭnik milicyi Mikałaj Šybałka.
— Da momantu majho prybyćcia na miescy ŭžo znachodzilisia bajcy AMAPu i śledča-apieratyŭnaja hrupa, była składziena schiema kvatery, prapracavana biaśpieka žycharoŭ, — raspaviadaje Mikałaj Šybałka. — Pieršapačatkova ja pasprabavaŭ źviazacca z mužčynam pa telefonie, adnak jon słuchaŭku nie padymaŭ. Praź niekatory čas udałosia pa telefonie źviazacca z haspadyniaj kvatery — maci złamyśnika. Žančyna paviedamiła, što jaje žyćciu ničoha nie pahražaje, a taksama raspaviała pra toje, što jaje syn chvaravita pieražyvaje razryŭ adnosin sa svajoj dziaŭčynaj Julijaj.
Viadoma ž, u pieršuju čarhu, my ŭličvali, što ŭ kvatery znachodzicca pažyłaja žančyna. Nieabchodna było dziejničać vielmi akuratna, kab supakoić mužčynu i dać jamu zrazumieć, što nie varta paharšać situacyju. Jon śćviardžaŭ, što naškodzić tolki sabie, a maci čapać nie budzie. Pieramovy doŭžylisia 55 chvilin. Pastupova napał pačaŭ spadać, mužčyna pryznaŭ svaju vinu ŭ napadzie na kiroŭcu i adčyniŭ dźviery. Na ščaście, nichto nie paciarpieŭ.
U vyniku ahladu kvatery byŭ znojdzieny pistalet marki «Beretta» kalibra 7,65 mm z adnym patronam u mahazinie.