30 % studentaŭ nie atrymajuć internataŭ
Sytuacyja pahoršyłasia paśla pryniaćcia rašeńnia ab tym, što naroŭni sa studentami biudžetnaj formy na miescy ŭ internatach mohuć pretendavać i płatniki.
U novym navučalnym hodzie ŭ Miensku nia bolš za 70% studentaŭ, jakija majuć patrebu ŭ žylli, buduć zabiaśpiečany internatami.
Jak paviedamiła načalnik upraŭleńnia raźvićcia materyjalna‑techničnaj bazy Ministerstva adukacyi Lidzija Zajcava, u minułyja hady miescy ŭ staličnych internatach atrymlivali pryblizna 80 % tych, chto mieŭ patrebu ŭ žylli. Sytuacyja pahoršyłasia paśla pryniaćcia rašeńnia ab tym, što naroŭni sa studentami biudžetnaj formy na miescy ŭ internatach mohuć pretendavać i płatniki. Akramia taho, čatyry minskija internaty zakryty na rekanstrukcyju, u tym liku internat BDU na 1.200 miescaŭ. U najbližejšy čas z ekspluatacyi vyvieduć jašče adzin internat BDU na praspekcie Pieramožcaŭ, raźličany na 600 miescaŭ.
«Sioleta prablemu zasialeńnia ŭ internaty ŭsich studentaŭ, jakija majuć patrebu ŭ žylli, my nie vyrašym», — padkreśliła specyjalist. Pavodle jaje słoŭ, u bolšaści VNU pravam pieršačarhovaha zasialeńnia buduć karystacca ilhotniki i studenty‑vydatniki. Tym, chto nie zmoža zasialicca ŭ internaty, z pošukam kvatery pasprabujuć dapamahčy studharadki.
Pavodle słoŭ Ł.Zajcavaj, zabiaśpiečanaść studentaŭ internatami ŭzraście da 90% bližej da 2011 hoda, kali žycharoŭ prymie studenckaja vioska. Pieršy jaje budynak — internat BDU na 1 tys. 300 miescaŭ — užo budujecca. Na ŭsie raboty vydzielena 43 młrd. rubloŭ. Internat planujecca zdać u 2009 hodzie.
Jak paviedamiła Ł. Zajcava, letaś zabiaśpiečanaść internatami ŭ Biełaruskim dziaržaŭnym universytecie składała 80 %, Biełaruskim nacyjanalnym techničnym universytecie — 60 %, Biełaruskim dziaržaŭnym instytucie infarmatyki i radyjoelektroniki — 60 %, Biełaruskim dziaržaŭnym ekanamičnym universytecie — 97 %, Minskim dziaržaŭnym linhvistyčnym universytecie — pryblizna 50 %, Biełaruskim dziaržaŭnym pedahahičnym universytecie imia Maksima Tanka — 43 %. Mižnarodny dziaržaŭny ekalahičny universytet imia Andreja Sacharava nie mieŭ ułasnaha internatu.
Pavodle słoŭ Ł. Zajcavaj, u rehijonach sytuacyja krychu lepš. Letaś studenty Homielskaha i Haradzienskaha dziaržaŭnych universytetaŭ, što majuć patrebu ŭ žylli, byli zabiaśpiečanyja internatami na 70 %, Mahiloŭskaha — na 90 %, Viciebskaha — na 100 %. Stopracentnaja zabiaśpiečanaść internatami była taksama ŭ Połackim i Baranavickim dziaržaŭnych universytetach, Viciebskim dziaržaŭnym technalahičnym, Bieraściejskim dziaržaŭnym techničnym universytecie i niekatorych inšych rehijanalnych VNU.