ES raspracuje adzinyja standarty jakaści charčovaj pradukcyi
Jeŭrapiejskaja kamisija ŭstała na bok uschodniejeŭrapiejskich dziaržaŭ u sprečcy ab standartach jakaści charčovych praduktaŭ. Kiraŭnik Jeŭrakamisii Žan-Kłod Junkier u čaćvier paśla sustrečy z premjer-ministram Słavakii Robiertam Fica zajaviŭ ab tym, što najaŭnaść roznych normaŭ dla roznych dziaržaŭ nieprymalnaja. «Hramadzianie Słavakii majuć prava atrymlivać pradukty, adpaviednyja adzinym standartam jakaści», — prakamientavaŭ jon.
Raniej mnohija inšyja krainy Uschodniaj Jeŭropy, u pryvatnaści, Vienhryja, Čechija i Polšča, taksama vystupili suprać «charčovaha aparteidu», admaŭlajučysia słužyć «śmiećcievym viadrom» dla Zachodniaj Jeŭropy, piša DW.
Vienhryja i Słavakija ŭ pačatku hoda prezientavali vyniki ekśpiertyzy, zhodna ź jakoj pradukty, jakija pradajucca ŭ hetych krainach, istotna adroźnivajucca ad ich ekvivalentaŭ, jakija pastupajuć na pryłaŭki zachodniejeŭrapiejskich dziaržaŭ. Naprykład, supavyja dabaŭki Knorr va Uschodniaj Jeŭropie ŭtrymlivajuć na 20% mienš źmieściva, čym takija ž prypravy ŭ zachodniejeŭrapiejskich kramach. U Słavakii pradukty adroźnivajucca vialikaj kolkaściu tłušču i mienšym utrymańniem miasa, zamiest cukru pry vytvorčaści časta vykarystoŭvajucca padsałodžvalniki, a zamiest fruktovych dadatkaŭ — štučnyja aramatyzatary.
Vytvorcy charčovaj pradukcyi abvinavačvańni abvierhli i nazvali adroźnieńni ŭ receptury śledstvam smakavych pieravah roznych nacyjanalnaściaŭ. Junkier zajaviŭ, što nie prymaje padobnych tłumačeńniaŭ i abviaściŭ ab namiery Jeŭrakamisii «pakłaści kaniec dyskryminacyi ŭ charčovaj halinie».
Premjer-ministr Słavakii nazvaŭ važnym toj fakt, što Jeŭrakamisija pryznaje situacyju niespraviadlivaj. «Kamuści heta moža zdacca śmiešnym, ale dla nas heta surjoznaja palityčnaja prablema», — skazaŭ jon.
Pa ciapierašnich praviłach, kampanii-vytvorcy charčovych praduktaŭ majuć prava zamianiać inhredyjenty ŭ zaležnaści ad miesca prodažu pry ŭmovie, što na ŭpakoŭcy pakazany źmienieny skład. Žan-Kłod Junkier paabiacaŭ raspracavać novy zvod praviłaŭ da vieraśnia hetaha hoda. U ciapierašni čas Jeŭrakamisija zajmajecca razhladam skarhaŭ, jakija pastupili ad 21 dziaržavy, jakaja ŭvachodzić u ES.