U Vieniesuele hrupa vajskoŭcaŭ pasprabavała skinuć prezidenta
Ułady paviedamili ab adnaŭleńni kantrolu.
U niadzielu, 6 žniŭnia, hrupa ŭzbrojenych ludziej na bazie 41-j braniatankavaj bryhady Uzbrojenych sił Vieniesueły pasprabavała padniać paŭstańnie suprać prezidenta Nikałasa Madury.
U zajavie, apublikavanaj u sacyjalnych sietkach, niekalki vajskoŭcaŭ pad kiraŭnictvam kapitana Nacyjanalnaj hvardyi Vieniesueły Chuana Kahuarypana paviedamili pra namier zmahacca sa «śmiarotnaj tyranijaj Nikałasa Madury». «Heta nie pieravarot. Heta hramadzianski i vajskovy ruch pa adnaŭleńni kanstytucyjnaha paradku i vyratavańni dziaržavy ad poŭnaha svavolstva, spynieńni zabojstva našaj moładzi i našych svajakoŭ», — zajaviŭ Kahuarypana, jaki ad 2014 hoda znachodzicca ŭ vyšuku.
Hrupa zaklikała da buntu ŭ štacie Karaboba.
Adzin ź lidaraŭ kirujučaj Sacyjalistyčnaj partyi Vieniesueły Dyasdada Kabieljo nazvaŭ heta «terarystyčnaj atakaj». Pavodle jaho słoŭ, ranicaj 6 žniŭnia ŭzbrojenyja miaciežniki zachapili vajskovuju bazu «Fuerte Paramakaj» u pryharadzie Valensii (štata Karaboba), ale nieŭzabavie kantrol nad joj byŭ viernuty.
Nahadajem, što Vieniesueła ciapier padzielenaja na «čavistaŭ», heta značyć paśladoŭnikaŭ levaj sacyjalistyčnaj ideałohii, jakoj kiravaŭsia niabožčyk prezident Uha Čavies, i tych, chto choča źmieny 18-hadovaha kiravańnia jaho Adzinaj sacyjalistyčnaj partyi Vieniesueły (PSUV).
Madura, jaki źmianiŭ paśla śmierci ŭ 2013 hodzie Čaviesa, byŭ abrany, kab praciahnuć jaho papulisckuju palityku baraćby ź niaroŭnaściu i halečaj šlacham pieraraźmierkavańnia prybytkaŭ ad naftavaha ekspartu — asnoŭnaj krynicy papaŭnieńnia biudžetu hetaj łacinaamierykanskaj krainy.
Adnak apazicyja zajaŭlaje, što za hady kiravańnia PSUV demakratyčnyja instytuty krainy byli razburanyja, a ekanomika pryjšła ŭ poŭny zaniapad. Čavisty ŭ adkaz vinavaciać apazicyju ŭ elityźmie, a jaje lidaraŭ u tym, što ich spansujuć ZŠA.
Padzieńnie syravinnych prybytkaŭ z-za nizkaj cany na naftu vymusili ŭłady skaracić sacyjalnyja prahramy. U krainie niekalki hadoŭ praciahvajecca skaračeńnie ekanomiki, raście inflacyja, isnuje vostry deficyt na tavary pieršaj nieabchodnaści i miedycynskija preparaty.