Vilenski aeraport znoŭ adčynicca 18 žniŭnia
Rekanstrukcyja ŭźlotna-pasadačnaj pałasy Vilenskaha aeraportu zavieršanaja.
11 žniŭnia pačnucca vyprabavańni abnoŭlenych asnoŭnych system kiravańnia palotami, jakija pavinny pakazać, ci hatovaja ŭźlotna-pasadačnaja pałasa i inšaja infrastruktura da ruchu samalotaŭ, pieradaje Delfi.
Vykanaŭčy dyrektar kampanii Lietuvos oro uostai (Aeraporty Litvy), jakaja kiruje mižnarodnymi aeraportami Vilni, Koŭna i Pałanhi, — Danatas Vaviarys paviedamiŭ, što vyprabavańni budzie pravodzić brytanskaja kampanija Flight Calibration Services. Samalot kampanii 11 žniŭnia apoŭdni pieršym pryziamlicca na abnoŭlenuju ŭźlotna-pasadačnuju pałasu.
«Testavańnie pravodzić samalot, jaki nazyvajuć mabilnaj labaratoryjaj, i doŭžycca vyprabavańni buduć da 14 žniŭnia. Kali daviadziecca štości karektavać, dadatkova rehulavać, a zatym testavać, to samalot moža zatrymacca daŭžej», — skazaŭ Vaviarys ahienctvu BNS.
Vilenski aeraport znoŭ adkryjecca 18 žniŭnia. Da kastryčnika tut buduć pravodzić zaklučnyja ziamielnyja pracy, što nijak nie paŭpłyvaje na avijaznosiny.
Aeraport byŭ zakryty na rekanstrukcyju 14 lipienia. Balšyniu avijarejsaŭ na 35 dzion pieraviali ź Vilni ŭ Koŭna.
Uźlotna-pasadačnuju pałasu abnavili łatvijskaje pradpryjemstva A.C.B. i kovienskaja budaŭničaja kampanija Autokausta. Rekanstrukcyja abyšłasia ŭ 18,7 miljona eŭra.