Žančynu, u jakoj zdarovaje dzicia ŭ časie chatnich rodaŭ zachłynułasia kalapłodnymi vodami, pryznali vinavataj, ale vyzvalili z turmy
Sud Čyhunačnaha rajona Viciebska vynies prysud pa rezanansnaj spravie, źviazanaj sa śmierciu dziciaci paśla chatnich rodaŭ. Abvinavačanaja — mama, 31-hadovaja žycharka Sankt-Pieciarburha Volha S. Praces pad staršynstvam sudździ Juryja Urbana byŭ zakrytym, pasiadžeńni išli na praciahu tydnia — z 30 žniŭnia. Žančynu abvinavačvali ŭ pryčynieńni śmierci pa nieaściarožnaści (č. 1 art. 144 KK Biełarusi).
Sankcyi č.1 art. 144 KK — papraŭčyja raboty na termin da 2 hadoŭ, abo abmiežavańnie voli da 3 hadoŭ, abo pazbaŭleńnie voli na taki ž termin. Sud prysudziŭ žančynu da 6 miesiacaŭ u kałonii-pasialeńni. Jaje vyzvalili ŭ zale suda, bo čas, praviedzieny ŭ SIZA, zaličany ŭ termin adbyćcia pakarańnia.
Nahadajem, spačatku paciarpiełaj u spravie pryznali pradstaŭnika orhanaŭ apieki — Juliju Alipavu. Adnak advakaty abvinavačvanaj (ich u jaje dvoje) zajavili chadajnictva, kab paciarpiełym pryznali muža Volhi. Sud chadajnictva zadavoliŭ — i paciarpiełym bokam staŭ tolki baćka pamierłaj novanarodžanaj dziaŭčynki. Paśla pradstaŭnik orhanaŭ apieki i prakuror vystupili za toje, kab zrabić praces zakrytym.
Na pieršym pasiadžeńni 30 žniŭnia Volha nastojvała na tym, kab spravu razhladali ŭ adkrytym režymie, padkreśliŭšy, što ŭ im zakranuty tolki jaje intaresy, i chavać žančynie niama čaho. Adnak sudździa vyrašyŭ pravieści zakrytaje raźbiralnictva, matyvavaŭšy heta tym, što na im buduć raspaŭsiudžvacca miedycynskija padrabiaznaści.
Volha pryjechała naradžać z Sankt-Pieciarburha ŭ Viciebsk, dzie jana prapisana. Uviečary 17 lutaha Volha ŭ kvatery maci na vulicy Miaśnikova naradziła dziaŭčynku. Śledstva śćviardžaje, što žančyna admoviłasia ad prymianieńnia miedykamientaŭ i praviadzieńnia šerahu važnych daśledavańniaŭ, a taksama ad špitalizacyi. Pry hetym u žanočaj kansultacyi № 5 abłasnoj radzilni, dzie Volha nazirałasia, jaje papiaredzili, što pry chatnich rodach vysokaja imaviernaść straty dziciaci.
Ubačyŭšy, što na śviet źjaviłasia dzicia, jakoje nie kryčyć i maje siniušnuju skuru, Volha paprasiła maci vyklikać chutkuju. Novanarodžanuju i paradzichu dastavili ŭ haradskuju kliničnuju balnicu chutkaj miedycynskaj dapamohi. Tut u 21.40 zafiksavali śmierć dziciaci. Pa dadzienych śledstva, u jaho adbyłasia aśpiracyja kalapłodnymi vodami. Heta značyć, u dychalnyja šlachi novanarodžanaj trapiła kalapłodnaja vadkaść.
Sudmiedekśpierty vyznačyli, što dzicia źjaviłasia na śviet zdarovym. Psichołaha-psichijatryčnaja ekśpiertyza nie vyjaviła ŭ žančyny ni chraničnaha psichičnaha zachvorvańnia, ni časovaha rasstrojstva psichiki, ni jakoha-niebudź inšaha chvaravitaha stanu psichiki. Na dumku ekśpiertaŭ i śledstva, jana mahła ŭśviedamlać niebiaśpieku svaich dziejańniaŭ.
Z 6 maja maładaja žančyna znachodziłasia ŭ viciebskim SIZA-2. Jaje maci chadajničała pra źmianieńnie miery strymańnia dla dački. Ale joj admovili. Na dumku śledstva, znachodziačysia na voli, Volha mahła źbiehčy ad «orhana, jaki viadzie kryminalny praces, i suda».
Cieła novanarodžanaj siamji vydali paśla ekśpiertyz praz 2,5 miesiaca — 5 maja. Na nastupny dzień adbyłosia pachavańnie. I ŭ hety ž dzień jaje maci aryštavali.
Stračanaje dzicia było ŭ maładoj siamji druhim. Da hetaha ŭ Volhi i jaje muža Aleha — rasijskaha biznesmena, taksama naradziłasia dačka, ciapier joj 2 hady. Jana źjaviłasia na śviet padčas chatnich rodaŭ, jakija prymaŭ Aleh. Muž i žonka ŭdvaich naviedvali ŭ Sankt-Pieciarburhu śpiecyjalnyja kursy pa vynošvańni zdarovaha dziciaci i chatnich rodaŭ.