Kryk dušy: kali ŭžo zakapajuć vulicu Rotmistrava ŭ Šabanach?
U paviedamleńniach na sajt «Našaj Nivy» pryjšoŭ list ad žycharoŭ minskaha mikrarajona Šabany pra toje, jak jany ŭžo ceły hod žyvuć u pierakapanych dvarach, štodnia zahadvajučy, ci budzie siońnia ciapło i haračaja vada ŭ ich kvaterach.
Źviartajemsia da vas z prośbaj ab dapamozie, bo nie viedajem, da kaho ŭžo źviartacca. Sprava ŭ tym, što minułaj vosieńniu (kastryčnik-listapad 2016 hoda) u mikrarajonie Šabany pa vulicy Rotmistrava pačalisia ramontnyja raboty, mierkavana — pa zamienie trub, — jakija praciahvajucca dahetul, voś užo amal jak hod pracy nie zaviaršajucca.
Pracami heta, viadoma, ciažka nazvać u suviazi z tym, što paśla taho, jak vakoł damoŭ usio pierakapali, doŭhi čas nichto z rabočych nie źjaŭlaŭsia, a kali i źjaŭlalisia, to niejkimi karotkimi pieryjadami (u zimovy čas praktykavałasia pieryjadyčnaje adklučeńnie haračaj vady i aciapleńnia, i pa hety dzień haračaje vodazabieśpiačeńnie časta adsutničaje, ranicaj, źbirajučysia na pracu, i ŭviečary, kali rychtuješsia da snu, časta vyjaŭlaješ adsutnaść haračaj vady (heta ŭžo jak łatareja: pašancuje/nie pašancuje, pamyješsia abo papiarednie pojdzieš hreć vadu ŭ kastruli), źviartajučysia pa telefonie 115, čaściej za ŭsio čuješ, što infarmacyja ab adklučeńni adsutničaje, h.zn. vada pa idei ŭ nas jość), paśla zimy pa viaśnie pracoŭnyja źjaŭlalisia jašče radziej (faktyčna pracy pravodzilisia adzin dzień za miesiac).
U letni pieryjad i zusim składvałasia takoje ŭražańnie, što praca była prypynienaja (žychary vielmi raźličvali, što pracy zavieršać u pieryjad płanavaha adklučeńnia haračaha vodazabieśpiačeńnia ŭ červieni, ale hetaha nie adbyłosia). Vakoł — sucelnyja hłybokija akopy, u jakija załaziać dzieci i hulajuć u ich, łaziać pamiž raskapanych trub i skačuć pa ich. Jak pačynajucca daždžy, vulica pieratvarajecca ŭ sucelnuju vialikuju łužynu brudu, i kab viarnucca dadomu nie pa kalena ŭ hrazi, davodzicca rabić takoha kruhala, što samo saboj nie vielmi zručna, a kali viartaješsia z pakupkami z kramy, to zusim niazručna.
U našym dvary, pa adrasie Rotmistrava dom 10, i da pačatku ramontnych rabot składana było pryparkavacca, a ciapier i zusim niama dzie. Žychary źviartajucca na haračuju liniju ŭ administracyju Zavodskaha rajona, ŽEA, ŽKH, ale ŭsie hetyja słužby pieranakiroŭvajuć adzin da adnaho, arhumientujučy, što heta pytańnie nie ŭ ich kampietencyi i jany biez paniaćcia, da kaho možna źviarnucca z pretenzijaj, u ŽES našaha rajona nam paviedamili, što płan pavinien znachodzicca na abjekcie i ŭsia infarmacyja vykładziena ŭ płanie z ukazańniem kantaktaŭ, pa jakich možna źviernucca z pretenzijaj (u pryvatnaści, usich cikavić, kali narešcie naša vulica nabudzie pieršapačatkovy vyhlad i pierastanie być padobnaj na budaŭničuju placoŭku, kali možna budzie spakojna adpuścić dzicia hulać na vulicu, nie pieražyvajučy, što jano praz svajo hłupstva nie palezie ŭ akop i nie daj boh tam ź im što-niebudź zdarycca). Płana z pačatku praviadzieńnia ramontnych prac nikoli nie było! Usie ŭžo vielmi stamilisia ad taho, što adbyvajecca, i nichto nie moža razabracca i dapamahčy ŭ situacyi, jakaja skłałasia, ceły hod na nievialikim učastku viaducca raboty i nijak nie daviaduć da finału.