Łukašenka naziraje za chodam vučeńniaŭ, Šajhu nie pryjechaŭ
Fota Darji Burakinaj
Alaksandr Łukašenka hladzić z naziralnaj placoŭki za chodam sumiesnych vučeńniaŭ Biełarusi i Rasii «Zachad-2017» na 227-m ahulnavajskovym palihonie Barysaŭski, paviedamlaje BiełTA.
Kiraŭnik krainy ahledzieŭ ruchomy punkt upraŭleńnia kamandujučaha RHV (s). Hety braniravany aŭtamabil ajčynnaj vytvorčaści abstalavany samymi sučasnymi srodkami suviazi, jakija dazvalajuć kiravać vojskami niepasredna ŭ ruchu.
«Małajcy! Za karotki pramiežak času zrabili dobruju sistemu», — adznačyŭ Łukašenka.
Fota Darji Burakinaj
Na palihonie adpracoŭvajucca ŭzhodnienyja dziejańni raznastajnych sił i srodkaŭ uzbrojenych sił Biełarusi i Rasii pa adbićci nastupu ŭmoŭnaha praciŭnika, praviadzieńni kontrataki i dalejšamu jaho razhromu. U chodzie rozyhryšu taktyčnych epizodaŭ prachodziać aprabacyju novyja ŭzory ŭzbrajeńnia i vajennaj techniki abaronnaha siektara ekanomiki Biełarusi: lohkabraniavanych aŭtamabili «V1» (MZKC), bronietransparcior «Kajman», radyjoelektronnyja strelby dla baraćby z multykopterami (AAT «KB Radar»), a taksama madernizavanyja tanki T-72 BM3.
Razam z Alaksandram Łukašenkam za vučeńniami na palihonie buduć nazirać dziaržsakratar Sajuznaj dziaržavy Ryhor Rapota, pasoł Rasii ŭ Biełarusi Alaksandr Surykaŭ. Čakałasia i prybyćcio ministra abarony Rasii Siarhieja Šajhu, pra heta zajaŭlali ŭ abaronnych viedamstvach dźviuch krain, adnak pa nieviadomaj pryčynie kiraŭnik Minabarony RF praihnaravaŭ naviedvańnie palihona «Barysaŭski», piša Tut.by.