Barščeŭski: Tolki bajkot
U sieradu lidery palityčnych siłaŭ, jakija vystupajuć za bajkot parlamenckich vybaraŭ, dali pres‑kanferencyju.
U sieradu lidery palityčnych siłaŭ, jakija vystupajuć za bajkot parlamenckich vybaraŭ, dali pres‑kanferencyju.
U joj udzielničali staršynia Partyi BNF Lavon Barščeŭski, lider «Maładoha frontu» Źmicier Daškievič i kaardynatar «Chartyi‑97» Źmicier Bandarenka. Nia zmoh pryjści tolki staršynia arhkamitetu BCHD Pavał Sieviaryniec, ale jon prasiŭ pieradać, što pazycyja arhanizacyi nie źmianiłasia, i pradstaŭniki ad BCHD zdymuć svaje kandydatury da 23 vieraśnia.
Lavon Barščeŭski ad pačatku prainfarmavaŭ, što na apošnim pasiedžańni Palitrady ADS było pryniataje patrabavańnie ŭklučyć pradstaŭnikoŭ apazycyi va ŭčastkovyja vybarčyja kamisii da 8 vieraśnia. Zroblena heta nie było, a kolkaść pradstaŭnikoŭ demakratyčnych siłaŭ u kamisijach vahajecca ŭ miežach statystyčnaj pamyłki. Paśla hetaha
staršynia BNF prademanstravaŭ vypusk hazety Rzeczpospolita ad 30 traŭnia, dzie lider AHP Anatol Labiedźka kazaŭ, što apazycyja pakidaje za saboj prava źniaćcia svaich vyłučencaŭ, kali nia budzie dapuščanaja da padliku hałasoŭ.
«Navat u paraŭnańni z 2004 hodam siońnia sytuacyja horšaja. Mianie, čałavieka nia novaha ŭ vybarčych kampanijach, nie ŭklučyli ŭ skład učastkovych kamisij u Kastryčnickim i Savieckim rajonach Miensku. Peŭna, nie chapiła kvalifikacyi», – kaža Ł. Barščeŭski.
Palityk pryznaje, što da ŭdziełu apazycyju padšturchoŭvajuć zboku — i ŭłada, i Zachad.
«Na Zachadzie ŭ peŭnych palityčnych kołach ciapier nazirajecca źmiena partnioraŭ u dačynieńni Biełarusi. Jany kažuć, što apazycyja słabaja, tamu nia treba ź joj razmaŭlać. Nam abiacajuć, što hołas apazycyi taksama budzie ŭličany. Ale apošnija padziei, jak sustreča Sidorskaha z premjeram Litvy Kirkiłasam, havorać ab advarotnym. Ideja abmiežavanaha pryznańnia pałaty znajšła prychilnikaŭ na Zachadzie. Niadaŭna i spadar Milinkievič zajaviŭ, što nia budzie suprać padobnaha pryznańnia. Na maju dumku, pałata nie pavinna być pryznanaja, my suprać pryznańnia režymu. Z 23 vieraśnia Partyja BNF budzie pracavać u režymie bajkotu. Siońnia naša zadača patrabavać novych vybaraŭ», — kaža Ł. Barščeŭski.
Na pytańnie pra zvarot, što padpisali 15 z 19 vyłučencaŭ ad BNF, Barščeŭski adkazaŭ, što jaho niama.
«Jość dakument, jaki nielha nazvać dakumentam. Tam niama nivodnaha podpisu, daty. Jość rašeńnie minułaha Sojmu partyi ab źniaćci svaich vyłučencaŭ, jakoje pavinna vykonvacca ŭsimi. Nia vyklučana, što 20 vieraśnia hetaje rašeńnie moža być pierahledžana, ale ja ŭ heta nia vieru. Vykarystaju uvieś svoj aŭtarytet, kab rašeńnie nie źmianiłasia. Kali my idziem na vybary da kanca, to heta faktyčnaje śviedčańnie taho, što my zhadzilisia, kab našy hałasy ličyli šulery», — praciahvaje staršynia BNF.
«Nielha čakać niejkaha demakratyčnaha padliku. Vybary ŭžo ciapier nia mohuć być pryznanymi lehitymnymi. Abaranić svaje hałasy my možam tolki 28 vieraśnia na Kastryčnickaj płoščy», — kaža staršynia «MF» Z. Daškievič.
Źmicier Bandarenka kaža, što choć «Chartyja‑97» ad pačatku vystupała za bajkot vybaraŭ, ale da apošniaha byli spadziavańni, što ŭłady mohuć pajści na sastupki. «Paśla 8 vieraśnia dyskusija skončyłasia», — kaža jon.
«Navošta Kalakin, Labiedźka, Statkievič iduć na vybary, ciažka zrazumieć. Labiedźka kaža, što vybary niespraviadlivyja, ale hramadzian nielha pazbaŭlać mahčymaści hałasavać. Prabačcie, ale heta toje samaje kali ŭ kramie lažyć tuchłaje miasa, ale spažyviec jaho musić užyvać. Pa maich padlikach, na siońnia kandydatami zarehistravanyja prykładna 115 čałaviek z demakratyčnymi pohladami, kali ŭsie jany zdymucca, to my atrymajem 70‑80 biezalternatyŭnych akruhaŭ. Kolki b ułada ni hnała ludziej na padobnaje hałasavańnie, ni pisała zavobłačnyja pracenty tych, što prahałasavali, nichto ŭ heta nie pavieryć. Pryznać takuju pałatu budzie vielmi prablematyčna. Nam ža lahčej budzie patrabavać novych vybaraŭ. Na siońnia ž
niekatoryja hatovyja pajści ŭ parlament u jakaści «šaściorak». Heta buduć ludzi, jakich asabista zaćvierdzić Łukašenka, na jakich budzie isnavać kampramat.Vaš hołas, kab nia byŭ skradzieny, moža być pačuty tolki na Płoščy», — kaža Z. Bandarenka.
Barščeŭski kaža, što svaimi zajavami pra bajkot vybaraŭ jany naŭrad ci pryniasuć škodu «toj rychłaj kaalicyi, jakaja isnuje zaraz». Na jahonuju dumku bolšuju škodu tut mohuć nanieści tyja palityki, jakija vystupajuć za pryznańnie pałaty ci Abchazii z Asiecijaj.