FSB płanuje pabudavać zaharodu na miažy akupavanaha Kryma z Ukrainaj
Pamiežnaje ŭpraŭleńnie FSB Rasii pa Respublicy Krym pabuduje 50-kiłamietrovuju zaharodu na miažy z Ukrainaj dla zabieśpiačeńnia biaśpieki respubliki, paviedamili TASS u pres-słužbie Pamiežnaha ŭpraŭleńnia.
TASS
Uładkavańnie zaharody abydziecca bolš čym u 200 młn rasijskich rubloŭ (kala $3,5 młn), raboty płanujecca zaviaršyć užo sioleta, vynikaje z materyjałaŭ na sajcie dziaržzakupak.
«U ciapierašni čas praca pa inžyniernym abstalavańni rasijska-ŭkrainskaha ŭčastka miažy viadziecca ŭ płanavym paradku, i budaŭnictva 50-kiłamietrovych inžyniernych zaharod na poŭnačy Kryma — jaje čarhovy etap», — paviedamili ŭ viedamstvie.
Jak paviedamlajecca na sajcie dziaržzakupak, viedamstva abviaściła aŭkcyjon na pastaŭku i mantaž płota vyšynioj bolš za dva mietry i daŭžynioj 49,5 km u Krasnapierakopskim rajonie, što miažuje z Ukrainaj. Zhodna z konkursnaj dakumientacyjaj, raboty pavinny być vykananyja da 20 śniežnia 2017 hoda.
Harantyjny termin ekspłuatacyi na inžyniernuju zaharodu i dadatkovaje abstalavańnie da jaho — nie mienš za 10 hadoŭ, pryčym ahavorvajecca, što kanstrukcyi pavinny być ustojlivyja da składanych klimatyčnych umoŭ (u tym liku vilhotnaści da 98% i tempieratury pavietra da plus 65 hradusaŭ).
Zhodna z dakumientacyjaj, kanstrukcyja płota pavinna zabiaśpiečvać vysokuju tryvałaść, daŭhaviečnaść i ekanamičnaść u ekspłuatacyi. Pieramožca budzie vyznačany 16 kastryčnika.