Irakskija kurdy prahałasavali za niezaležnaść
Nasielnictva irakskaha Kurdystana pieravažnaj bolšaściu prahałasavała za niezaležnaść na refierendumie, jaki prajšoŭ u paniadziełak, paviedamlaje VVS.
Getty
Pavodle danych vybarčaj kamisii Kurdystana, 92,73% addali svaje hałasy za niezaležnaść hetaj aŭtanomnaj terytoryi. 7,27% vystupili suprać.
Usiaho ŭ refierendumie ŭziali ŭdzieł amal 3,3 miljona čałaviek, heta prykładna 72% vybarščykaŭ.
Lidar irackich kurdaŭ Masud Barzani zajaviŭ, što vyniki hałasavańnia nie pryviaduć da nieadkładnaha abviaščeńnia niezaležnaści, ale pavinny adkryć dźviery dla pieramoŭ.
Kurdskija lidary pierakananyja ŭ tym, što ciapier u ich jość mandat na viadzieńnie pieramoŭ z Bahdadam ab adździaleńni.
Refierendum vyklikaŭ žorstkuju krytyku irakskaha ŭrada i susiednich ź Irakam krain. Bahdad da apošniaha momantu patrabavaŭ jaho admieny.
«Refierendum pavinien być admienieny. Nieabchodna pačać dyjałoh u ramkach kanstytucyi. My nikoli nie ŭstupim u pieramovy pa vynikach refierendumu», — zajaviŭ napiaredadni hałasavańnia premjer-ministr Iraka Chajder Abadzi.
«My ŭstalujem irakskija zakony pa ŭsioj terytoryi Kurdystana ŭ adpaviednaści z kanstytucyjaj», — paabiacaŭ irakski premjer, vystupajučy pierad členami parłamienta.
Irakski parłamient zaklikaŭ urad krainy nakiravać vojski ŭ Kurdystan, kab uziać pad svoj kantrol važniejšyja naftavyja radoviščy na kurdskaj terytoryi.
Irakskija ŭłady zapatrabavali ad zamiežnych uradaŭ zakryć svaje dypłamatyčnyja misii ŭ Erbile, stalicy Kurdystana.
Mnohija aścierahajucca, što refierendum u irakskim Kurdystanie pryviadzie da novaha rehijanalnaha kanfliktu.