U Yahoo skrali 3 miljardy parolaŭ — heta najbujniejšy vypadak kradziažu ŭ historyi
Amierykanskaja internet-kampanija Yahoo zajaviła, što ŭ jaje byli skradzienyja nie tolki asabistyja źviestki 500 miljonaŭ karystalnikaŭ u 2014 hodzie, i nie tolki źviestki 1 miljarda ŭ 2013-m, jak paviedamlałasia raniej, a źviestki ŭsich 3 miljardaŭ karystalnikaŭ, paviedamlaje Radyjo Svaboda.
Novyja acenki ataki 2013 hodu ŭtraja pieravyšajuć raniejšyja. Z kastryčnika kampanija pačała rassyłku elektronnych listoŭ z paviedamleńniem pra «dadatkovych» achviaraŭ ataki.
Kampanija śćviardžaje, što skradzienyja źviestki nia ŭtrymlivali niezašyfravanyja paroli, źviestki pra bankaŭskija kartki ci rachunki. Skradzienyja źviestki mohuć uklučać imiony, adrasy elektronnaj pošty, numary telefonaŭ, daty naradžeńnia, zašyfravanyja paroli, a taksama ŭ asobnych vypadkach niezašyfravanyja adkazy na sakretnyja pytańni. Niekatoryja skradzienyja źviestki mohuć dać chakieram zavałodać akaŭntam biaź viedańnia parolu.
Heta najbujniejšy viadomy vypadak kradziažu asabistych źviestak u historyi čałaviectva — taksama jak najbujniejšymi ličylisia raniejšyja zdareńni z Yahoo.
Jak adbyvalisia ŭzłomy, kampanija pa-raniejšamu nie raspaviadaje padrabiazna, ale zajaŭlaje, što padazraje «chakieraŭ, spansavanych dziaržavaj».
Usiaho Yahoo maje kala 1 młrd karystalnikaŭ, aktyŭnych štomiesiac, i 225 młn aktyŭnych karystalnikaŭ jaje paštovaha servisu. Heta značyć, byli skradzienyja źviestki i šmatlikich nieaktyŭnych, raniejšych karystalnikaŭ servisaŭ kampanii.
Sioleta ŭ červieni mabilny apieratar Verizon zaviaršyŭ uhodu ab pahłynańni Yahoo za 4,8 młrd dalaraŭ.