Za intervju sa ślaźmi ŭ padtrymku «Zachadu-2017» hłybockaha žurnalista pakarali
Niezaležnaha žurnalista Źmitra Łupača sud pryznaŭ vinavatym u parušeńni artykułu 22.9 KaAP. Sudździa Hłybockaha rajsudu Andrej Tarasievič pastanaviŭ, što spadar Łupač zajmaŭsia «niezakonnym vyrabam pradukcyi ŚMI», i pakaraŭ jaho štrafam pamieram 30 bazavych vieličyń.
Źmicier Łupač
Adzinym śviedkam na sudovym pracesie byŭ hłybačanin Uładzimier Protas — hieroj taho samaha interviju, pakazanaha na «Biełsacie». Spadar Protas skazaŭ na sudzie, što sam padyšoŭ da čałavieka z kameraj i prapanavaŭ zapisać ułasnaje mierkavańnie nakont vučeńniaŭ «Zachad-2017». Tak hledačy daviedalisia, što ŭ Hłybokim žyvie spadar, jaki sa ślaźmi na vačoch vitaje praviadzieńnie biełaruska-rasiejskich supolnych vučeńniaŭ, bo ŭ Biełarusi «nie pavinna być nataŭskich tankaŭ», jakija jahony «baćka vyhnaŭ u 1945 hodzie».
Administracyjnuju spravu suprać hłybockaha žurnalista raspačaŭ staršy inspektar miascovaha RAUS Siarhiej Cyrban. Jak napisana ŭ pratakole, pravaparušeńnie z boku Źmitra Łupača jon zaŭvažyŭ, «pravodziačy manitorynh sietki internet». U materyjałach sudovaj spravy paznačana, što «miesca pravaparušeńnia» — heta «navinavy błoh» na «televizijnym sajcie belsat.eu». I što interviju ŭ spadara Protasa žurnalist uziaŭ 27-ha vieraśnia, choć nasamreč heta adbyłosia na dzień raniej.
Niedakładnaści i niestykoŭki ŭ pratakole ab pravaparušeńni sudździu Tarasieviča nie źbiantežyli. Na padstavie hetaha dakumentu jon pryznaŭ žurnalista vinavatym. I prysudziŭ štraf, jaki staŭsia ŭžo trecim pakarańniem dla Źmitra Łupača za žurnalisckuju dziejnaść.
Minuły raz padobnaje zdaryłasia ŭ sioletnim traŭni: Hłybocki sud pryznaŭ Źmitra Łupača vinavatym u niezakonnym vyrabie i raspaŭsiudzie pradukcyi ŚMI — za siužet, pakazany na telekanale «Biełsat». Tam apaviadałasia pra dom № 142 pa vulicy Lenina ŭ Hłybokim, jaki ŭžo niekalki dziesiacihodździaŭ vymahaje kapramontu. Sudździa Ludmiła Vaščanka nakłała na Źmitra Łupača štraf pamieram 30 bazavych (690 rubloŭ).
U lipieni 2015-ha niezaležny žurnalist taksama byŭ pryznany vinavatym pavodle artykułu 22.9 KaAP č.2 (niezakonny vyrab i raspaŭsiud pradukcyi ŚMI). Spravu razhladała staršynia Hłybockaha rajsudu Iryna Kazak. Tady Źmitra Łupača aštrafavali na 25 bazavych vieličyń za artykuł «Znajšlisia svajaki pamiežnika, jaki zahinuŭ na Hłyboččynie 17 vieraśnia 1939 hodu», raźmieščany na sajcie Eŭraradyjo.