Pjany dyrektar fitnes-centra, jaki ŭ svoj čas pahražaŭ Matolku, prataraniŭ taksi. Dzie jon — nieviadoma
abnoŭlena
Viačasłaŭ Karniejaviec, fota z sacyjalnych sietak.
Była historyja: minski fatohraf Anton Matolka apublikavaŭ fota «BMV», zaparkavanaj nachabam na tratuary. Tady «kruty pacan na BMV» staŭ pahražać Matolku ŭ sacsietkach. Pryčym nastolki, što fatohraf vymušany byŭ adkryć ich pierapisku publicy, kab pierastrachavacca.
Mažora zvali Viačasłaŭ Karniejaviec, Matolka raskapaŭ, što jon syn upłyvovych baćkoŭ. Jahonaja maci — suzasnavalnica miedcentra «Nardzin» i pradpryjemstvaŭ u miedycynskaj śfiery ŭ Rasii. Baćka — trenier nacyjanalnaj kamandy pa viesłavańni.
I voś imia Karniejaŭca ŭspłyła ŭ novym skandale.
U dačynieńni da dyrektara fitnes-centra «Nardzin» Viačasłava Karniejaŭca raspačata kryminalnaja sprava, paviedamlaje Śledčy kamitet. Akazvajecca, heta jon za rulom taho samaha biełaha BMV padbiŭ mašynu taksi na vulicy Kalvaryjskaj u Minsku ŭ noč na 7 kastryčnika.
Karniejaviec nie daŭ rady kiravańniu i ŭrezaŭsia ŭ słup, a ad jaho mašynu adkinuła ŭ susiedni aŭtamabil. Paśla sutyknieńnia jon pasprabavaŭ źbiehčy, ličyć DAI Minska.
Vyjaviłasia, što ŭ Karniejaŭca było 0,94 pramile ałkaholu.
Kiroŭcu taksi paśla avaryi dastavili ŭ reanimacyju. U jaho byli zakrytyja čerapna-mazhavyja traŭmy — vielmi ciažkija, a taksama pierałomy levaj i pravaj łapatak i papiaročnaha adrostka chrybta. Taksist trapiŭ u komu, vyjšaŭ ź jaje nienadoŭha i znoŭ pahruziŭsia ŭ komu.
Ciažka skazać, ci zastaniecca taksist žyvy. Varta adznačyć, što jon — małady tata. Jaho dziciaci — 2 hady 9 miesiacaŭ, jaho žonka — u dekrecie.
Fatahrafii na staronkach Viačasłava Karniejaŭca ŭ sacyjalnych sietkach — pieravažna z načnych kłubaŭ i restaranaŭ.
Śledčyja rasšukvajuć Karniejaŭca.