Ukrainskaja alimpijskaja čempijonka: «Vital Ščerba — monstr, jon zhvałciŭ mianie, kali ja była 15-hadovaj dziaŭčynkaj»
Słavutaja ŭkrainskaja himnastka, dvuchrazovaja alimpijskaja čempijonka Taciana Hucu na ŭłasnaj staroncy ŭ Facebook abvinavaciła lehiendarnaha biełaruskaha himnasta Vitala Ščerbu ŭ zhvałtavańni, jakoje nibyta zdaryłasia na spabornictvach ŭ Štutharcie ŭ 1991 hodzie. Hucu tady było 15 hod, Ščerbu — 19.
Vital Ščerba ciapier.
«Vital Ščerba — monstr, jaki trymaŭ mianie ŭ pałonie ŭłasnych strachaŭ stolki hadoŭ. Ja viedaju, ty budzieš abaraniacca, ale maje padrabiaznaści šmatkroć macniejšyja za tvaje słovy. Ja ciapier macniej, čym kali-niebudź. Tabie mianie bolš nie źniavažyć. Heta maja historyja papiałuški», — piša himnastka.
U svaim paviedamleńni Hucu, jakaja pierajechała ŭ ZŠA ŭ 1993 hodzie i ciapier treniruje dziaciej va ŭłasnaj akademii himnastyki ŭ Mičyhanie, adznačaje, što jaje byłyja partnery pa kamandzie Taciana Torapava i Rustam Šarypaŭ nie zastupilisia za jaje, kali adbyłosia zdareńnie.
«Dziakuj tabie, Taciana Torapava, pra jakuju ja dumała, što ty maja siabroŭka pa žyćci i ŭ zbornaj SSSR, za toje, što nie zastupiłasia za mianie, kali ja bolš za ŭsio mieła patrebu ŭ tabie. Ty była tam. Ty ŭsio čuła. Ale nie abaraniła mianie, — napisała Hucu. — Rustam Šarypaŭ, i tabie dziakuj, što ty byŭ dobrym siabram dla svajho siabra i nie abaraniŭ mianie, maleńkuju 15-hadovuju dziaŭčynku».
Taciana Hucu adznačyła, što budzie padtrymlivać usich achviaraŭ hvałtu, chto, jak i jana kaliści, baicca havaryć i maje patrebu ŭ dapamozie.
Vital Ščerba naradziŭsia ŭ Miensku ŭ 1972 hodzie. Na Alimpijadzie-1992 u Barselonie jon vyjhraŭ šeść załatych medaloŭ, što zrabiła jaho ci nie najvialikšym himnastam usich časoŭ. Ad momantu zakančeńnia spartovaj karjery ŭ 1996-m Ščerba žyvie ŭ ZŠA, časam naviedvajučysia na radzimu.
***