Vice-śpikier Viarchoŭnaj Rady Ukrainy pra Minsk: Zusim nie adčuvaješ, što ty ŭ Biełarusi, a nie ŭ Rasii
Ukrainski palityk, pieršy namieśnik staršyni Viarchoŭnaj Rady Ukrainy Iryna Hieraščanka padzialiłasia na svajoj staroncy ŭ fejsbuku ŭražańniami ad naviedvańnia Minska.
«Samy pieršy rejs u biełaruskuju stalicu prybyvaje vielmi rana. Paśla peŭnych pošukaŭ (tamu što ranicaj tut ničoha nie pracuje, heta nie Kijeŭ) ja ablubavała adnu kaviarańku z dobrym kapučyna. A 8 tut zusim pusta, a 9 zała ŭžo zapoŭniena. Cikavaje nazirańnie, u asnoŭnym heta mužčyny, jakija viaduć dziełavyja pieramovy (u Kijevie, naadvarot, ranišnija kaviarni — miesca sustreč i viasiołaha ščabiatańnia dziaŭčat). I voś ni adnaho, ni razu nie čuła tut biełaruskaj. Tolki ruskaja. Aficyjanty, naviedvalniki, usio biez vyklučeńnia razmaŭlajuć tolki na ruskaj, i zusim nie adčuvajecca, što ty ŭ Biełarusi, a nie ŭ Rasii.
Ukrainie ciapier vielmi ciažka, usie hramadzianie płaciać vielmi vysokuju canu za samavyznačeńnie i niezaležnaść, za samaidentyfikacyju. Ale — my na pravilnym šlachu, na svaim, zavajavanym i žadanym nami, jak narodam i krainaj. Tak vostra adčuvaju heta ŭ Biełarusi. I tak strašna, što my možam, praz ułasnuju biazdumnaść, heta stracić. Nie majem prava stracić», — napisała Hieraščanka.
U kamientach spadaryni Hieraščanka pišuć, što ŭ Kijevie taksama nie zaŭsiody možna pačuć u kaviarniach ukrainskuju. «Čym daražejšaja kaviarnia, tym mieniej ukrainskaj», — adkazvajuć joj. Inšy karystalnik adznačaje, što ŭ Kijevie prykładna tracina naviedvalnikaŭ kaviarniaŭ usio ž havoryć pa-ŭkrainsku.
«Heta vyniki aficyjnaha dvuchmoŭja», — tłumačać Hieraščanka.
***