Kvintesiencyja vosieni: harbuzovy kieks ź jabłykami, žuravinami i arechami
Časta sustrakaju ludziej, jakija da harbuza jak da praduktu staviacca z padazreńniem. Chtości pakaštavaŭ u dziacinstvie harbuzovuju kašu i, miakka kažučy, nie acaniŭ; chtości naohuł nie ŭjaŭlaje, kudy možna prymianić hetuju kałarytnuju aranžavuju harodninu… Ja i sama da niadaŭniaha času była takoju. Ale ciapier ja dakładna viedaju: najlepšaje miesca harbuza — u vypiečcy!
I chaj harbuzovuju vypiečku rodnyja i siabry zvyčajna sustrakajuć ź niedavieram, usio źmianiajecca paśla pieršaha ž źjedzienaha kavałačka — pravierana nieadnarazova. Pasprabujcie pačać voś z hetaha kieksa: upeŭnienaja, navat samyja zaciatyja «nieamatary» harbuza, pakaštavaŭšy jaho, źmieniać svajo mierkavańnie.
Vam spatrebicca:
- 1 šklanka muki
- 1 č.ł. razrychlalniku
- 1/4 č.ł. sody
- 1 č.ł. cynamonu
- 1/4 č.ł. muskatnaha arechu
- 1/2 č.ł. imbiru
- drobka soli
- 70 h masła
- 2/3 šklanki cukru
- 1 jajka
- 2/3 šklanki harbuzovaha piure
- 1 jabłyk
- 1/2 šklanki žuravin (śviežych albo sušanych)
- 1/2 šklanki arechaŭ (hreckija albo piekan; u mianie byŭ funduk — taksama dobra)
Para zaŭvah:
Usie pradukty dla kieksa pavinny być pakajovaj tempieratury.
Harbuzovaje piure ja hatuju tak: čyšču i režu harbuz na nievialikija kavałački, zapiakaju ŭ duchoŭcy na 200°S kala 40 chvilin, astudžaju i rablu piure blendaram. Kali harbuz zanadta vadzianisty, lišniuju vadu možna adcisnuć. Piure vydatna zachoŭvajecca ŭ ladoŭni, možna pryhatavać adrazu šmat, zamarozić porcyjami i razmarožvać pry patrebie.
Najlepiej hety kieks vypiakać u formie ź dzirkaj (albo ŭ vuzkaj i doŭhaj), kab vilhotnaje ciesta dobra prapiakłosia. Dadzienaja kolkaść praduktaŭ — na formu dyjamietram 22 sm. Ale ja raju adrazu rabić padvojnuju porcyju: nie paśpiejecie azirnucca, jak hety kieks źniknie z vačej.
Jak hatavać:
1. Raźmiakčanaje masła ŭźbivać z cukram 3-4 chviliny. Dadać jajka, uźbivać jašče chvilinu.
2. Dadać piure z harbuza i drobna parezany jabłyk, pieramiašać.
3. Źmiašać muku z razrychlalnikam, sodaj, śpiecyjami i sollu. Usypać mučnuju sumieś u maślana-harbuzovuju, pieramiašać.
4. Dadać drobna pasiečanyja arechi i žuraviny, aściarožna pieramiašać.
5. Vypiakać na 180°S prykładna 60 chvilin (praviarajcie draŭlanaj špažkaj). Vymać z formy paśla poŭnaha astyvańnia.