Pucin zajaviŭ, što zachodnija śpiecsłužby źbirajuć u rasijan «bijałahičny materyjał». Dla čaho?
30 kastryčnika prezident Rasii Uładzimir Pucin pravioŭ sustreču z Radaj pa raźvićci hramadzianskaj supolnaści i pravach čałavieka. Tam kiraŭnik Rasii adkazvaŭ na pytańni pravaabaroncaŭ.
Samaj intryhoŭnaj frazaj, jakuju vydaŭ Pucin tyčyłasia taho, što zamiežniki źbirajuć u Rasii «bijałahičny materyjał»:
«Vy viedajecie, što bijałahičny materyjał źbirajecca pa ŭsioj krainie. Pryčym pa roznych etnasach i ludziach, jakija pražyvajuć u roznych hieahrafičnych punktach Rasijskaj Fiederacyi. Voś pytańnie — heta navošta robiać? Robiać metanakiravana i prafiesijna.
My taki voś abjekt vielmi vialikaj cikavaści. Nam treba, viadoma, biez usialakich strachaŭ da hetaha stavicca. Jany niachaj robiać, što jany chočuć, a my pavinny rabić toje, što my pavinny».
Na nastupny dzień zajavu Pucina prakamientavaŭ pres-sakratar prezidenta Rasii Dźmitryj Piaskoŭ.
«Śpiecsłužby Rasii majuć infarmacyi pra zbor niekatorymi emisarami i niaŭradavymi arhanizacyjami bijałahičnaha materyjału pradstaŭnikoŭ roznych rasijskich etnasaŭ», — skazaŭ jon.
Dyk što takoje mieŭ na ŭvazie Pucin? Adzinaja adkazu pakul nie maje nichto, zatoje vykazvajecca mnostva viersii. I navukovych, i bolš padobnych da teoryj zmovy.
Zakupy VPS ZŠA
Jašče letam na sajcie dziaržaŭnych zakupak ZŠA źjaviłasia navina, što vučebnaje avijacyjnaje kamandavańnie VPS ZŠA źbirajecca nabyvać uzory RNK (rybanukleinavaja kisłata) — žyvych tkanak rasijan jeŭrapieoidnaj rasy.
Adnak amierykancy byli zacikaŭlenyja tolki ŭ nabyćci 12 uzoraŭ RNK i 27 uzoraŭ sinavijalnaj abałonki, jakaja prypracoŭvaje nieabchodnuju dla sustravaŭ sinavijalnuju vadkaść. Ukazvałasia, što pryjom donaraŭ z Ukrainy nie dapuskajecca.
Dla čaho heta ŭsio, nie paviedamlałasia.
Doktar bijałahičnych navuk, bijainfarmatyk Michaił Hielfand skazaŭ, što heta rabiłasia dla raspracoŭki terapii hienietyčnych determinantnych chvarobaŭ sustavaŭ.
Pa słovach Hielfanda, pa bijamateryjale niemahčyma zrabić bijazbroju, bo hienietyčna ludzi nadta padobnyja adzin na adnaho i heta vyklučaje mahčymaść źniščyć pradstaŭnikoŭ adnoj nacyi.
«Heta niejkaja miarzotnaja chłuśnia», — skazaŭ navukoviec.
Etničnaja zbroja
Uradženiec Biełarusi, namieśnik staršyni kamiteta Savieta Fiederacyi pa abaronie i biaśpiecy Franc Klincevič vykazaŭ dumku, što takim čynam amierykancy rychtujuć bijałahičnuju zbroju.
«Roznyja pa etničnaj prykmiecie ludzi pa-roznamu reahujuć na bijałahičnuju zbroju, tamu zbor i adbyvajecca ŭ roznych etnasaŭ», — skazaŭ Klincevič.
«Na Zachadzie ŭsio vyviarajuć da drobiaziaŭ. Kali ŭžo prymianiać bijałahičnuju zbroju, to z upeŭnienaściu», — dadaŭ jon. Na dumku Klinceviča, zachodnija śpiecsłužby rychtujucca da bijałahičnaj vajny.
Padobnaje mierkavańnie vykazvajuć i niekatoryja vučonyja. Navukovy supracoŭnik Instytuta marfałohii čałavieka Siarhiej Savieljeŭ vykazaŭ zdahadku, što takim čynam sprabujuć stvaryć «etničnuju zbroju». Na jahonuju dumku, pry siońniašnich technałohijach stvaryć etničnuju zbroju možna za 2—3 hady.
«Raboty ŭ halinie stvareńnia etničnaj zbroi byli pačaty kala 30 hadoŭ tamu. Jana raźličana na toje, kab vyłučyć niekatoryja frahmienty DNK, jakim arhanizavać virusnyja infiekcyi, jakija buduć źviazvacca i bić kankretna pa tych ci inšych etničnych hrup. Heta značyć, zabivać metanakiravana. Kažuć, takija «štučki» mohuć być pryhatavanyja navat indyvidualna», — adznačyŭ Savieljeŭ.
Dla vyvučeńnia hienietyčnaj roznaści
Dyrektar kampanii Genotek hienietyk Valeryj Iljinski paćvierdziŭ, što zbor hienietyčnych dadzienych u Rasii sapraŭdy pravodzicca.
«Nakolki ja viedaju, na terytoryi našaj krainy jość dva centry, adzin u Maskvie, a inšy ŭ Pieciarburhu, jakija zajmajucca zboram bijamateryjałaŭ samych roznych narodaŭ Rasii i adpraŭlajuć ich svaim kaleham u ZŠA. Asnoŭnaja meta hetych daśledavańniaŭ, miarkujučy pa tych publikacyj, jakija źjavilisia za apošnija hady, zaklučajecca ŭ vyvučeńni hienietyčnaj raznastajnaści roznych etnasaŭ u Rasii, u pošuku adroźnieńniaŭ pamiž imi, u tym liku i taho, jakija chvaroby ich paražajuć, i ŭ apisańni hetych adroźnieńniaŭ», — skazaŭ Iljinski.
Admietna, što ŭ 2014 hodzie startavaŭ prajekt «Rasijskija hienomy». Bijamateryjały adpraŭlalisia ŭ Centr hienomnaj bijainfarmatyki imia Dabržanskaha Sankt-Pieciarburhskaha ŭniviersiteta. Jaho dyrektaram pracuje amierykaniec Stefan Džejms O'Brajen, jaki raniej kiravaŭ łabaratoryjaj hienomnaj raznastajnaści rakavaha instytuta Nacyjanalnaha instytuta zdaroŭja ZŠA.
Moža być, mienavita z hetaha i źlapili padobnuju teoryju zmovy.