Cudoŭnaja sałodkaja vynachodka: košyčki ź jabłykami i šviejcarskaj mierenhaj
recept na vychodnyja
Skažu adrazu: ja nie fanat «drobnaj matoryki» ŭ vypiečcy. Maje lubimyja recepty — kali ŭsio źmiešvajecca za 10 chvilin, pažadana ŭ adnoj miscy, i vylivajecca ŭ formu. Ale časam zorki sychodziacca voś tak.
Usio pačałosia ź białkoŭ, što zastalisia ad «karbanary», jakuju my hatavali napiaredadni. Ja pačała prykidvać, kudy b ich prystroić, kali muž u čarhovy raz nahadaŭ pra białkovy krem. Jon vialiki jaho amatar, a ja jašče ni razu nie rabiła, niahledziačy na prośby. Sprava ŭ tym, što «mahazinny» krem zaŭsiody vyklikaŭ u mianie padazreńni, bo białki ŭ im nie prachodziać termaapracoŭku, a jakaść mahazinnych jajek taksama niemahčyma harantavać na 100%. Ale hetym razam ja pryhadała, što ŭ adnoj z kulinarnych knih natrapiła na tak zvanuju «šviejcarskuju mierenhu» — sposab, kali białki ŭźbivajucca na «vadzianoj łaźni», to bok prachodziać apracoŭku vysokaj tempieraturaj.
I tak naradzilisia maje pieršyja ŭ žyćci pirožnyja. Viadoma, ź imi pryjšłosia pavazicca krychu bolš, čym ź jakim kieksam, ale vynik byŭ taho varty. A šviejcarskaja mierenha nazaŭždy źmianiła majo ŭjaŭleńnie pra białkovy krem: dalikatnaja, ciahučaja, u spałučeńni z krochkim ciestam i sałodka-kisłaj načynkaj, jana dała vydatny efiekt.
Vam spatrebicca:
dla ciesta:
- 200 h muki
- 100 h chałodnaha masła
- drobka soli
- 5-6 łyžak ledzianoj vady
dla načynki:
- 5-6 siarednich jabłykaŭ
- cedra 1 apielsina
- 3-4 st.ł. cukru
- 1 č.ł. cynamonu
- žmienia žuravin
dla kremu:
- 2 nievialikija białki
- 80 h cukru
Jak hatavać:
1. Dla ciesta chutka pasiekčy muku z sollu i masłam (najlepš u kambajnie, ja ž za jaho adsutnaściu nacirała masła na tarcy) u krošku. Dadać vadu (moža spatrebicca krychu bolš) i znoŭ chutka zamiasić ciesta (ni ŭ jakim razie mocna nie vymiešvać, dastatkova, kab jano źlapiłasia ŭ kamiak).
2. Raskačać ciesta ŭ płast, vyrazać kruhłyja zahatoŭki i raskłaści pa formačkach (ja rabiła ŭ formie dla mafinaŭ na 12 štuk). Ciesta źlohku nakałoć videlcam i pastavić formu ŭ chaładzilnik na hadzinu (abo ŭ marazilnik na 15-20 chvilin).
3. Dla načynki pačyścić i drobna parezać jabłyki, dadać cukar (jaho kolkaść rehulujecca na smak, u zaležnaści ad taho, nakolki kisłyja jabłyki), cedru i cynamon i patušyć u patelni na łyžcy masła da miakkaści. Vadkaść pavinna całkam vyparycca. Načynku astudzić.
4. Vykłaści načynku ŭ košyčki ź ciesta, dadać pa 4-5 jahad žuravin. Vypiakać na 200°S kala 30 chvilin (pakul nie padrumianicca ciesta).
5. Dla mierenhi pakłaści ŭ misku białki i cukar. Misku ŭstalavać nad rondalem z kipiačaj vadoj. Uźbivać miksieram 5-7 chvilin, pakul masa nie stanie vielmi ščylnaj i bliskučaj.
6. Vykłaści krem na hatovyja pirožnyja (možna łyžkaj, ale ja sprabavała adsadzić z dapamohaj kandytarskaha miaška. Nu, što skazać, u hetym mastactvie treba jašče šmat praktykavacca:)). Zapiačy pad hrylem abo na 250°S da lohkaha zarumiańvańnia białkoŭ (sačycie ŭvažliva, heta adbyvajecca vielmi chutka).
Hatujcie taksama:
- Bliny z syram i zielaninaj
- Aładki ź jabłykami
- Harbuzovy kieks ź jabłykami, žuravinami i arechami
- Dva chutkija VIDEArecepty sałataŭ z rybaj
- Piečyva z žuravinami
- Jabłyčny kieks z syram