Žuraŭkoŭ, Vasilevič, Łukašaniec, Marzaluk… Chto pretenduje ŭ akademiki i členy-karespandenty?
Jašče ŭ žniŭni Prezidyum NAN RB paviedamiŭ pra toje, što vakantnyja 13 zvańniaŭ akademikaŭ i bolš za 30 členaŭ-karespandentaŭ. Nabližajecca dzień hałasavańnia — 16 listapada. Usie pretendenty vyznačany, raskładami dzielicca «Biełpartyzan».
Tak, na adnu vakansiju akademika ŭ halinie biełaruskaj fiłałohii jość tolki adzin pretendent. Heta doktar fiłałahičnych navuk, prafiesar, člen-kar NAN RB, dyrektar Instytuta movaznaŭstva Alaksandr Łukašaniec. Takim čynam, Łukašaniec maje ŭsie šancy.
A voś za zvańnie akademika pa śpiecyjalnaści «historyja Biełarusi» namiačajecca baraćba. Vakansija adna, a kandydataŭ dvoje. Heta śpiecyjalist pa partyi, chutčej ideołah, čym historyk, Uładzimir Babkoŭ i były dyrektar Instytuta historyi NAN RB Alaksandr Kavalenia. Šancaŭ u Kavaleni bolš, bo ciapier jon źjaŭlajecca akademikam-sakratarom u adździaleńni humanitarnych navuk. Adnak za šeść hadoŭ dyrektarstva Kavaleni ŭ Instytucie historyi ŭ vyniku pieraprafilavańnia adździełaŭ instytuta pracu ŭ im stracili mnohija viadomyja historyki. U tym liku — Hienadź Sahanovič, Andrej Kištymaŭ, Siarhiej Tarasaŭ, Jaŭhien Aniščanka. Toj ža Aniščanka, da prykładu, publična zajaŭlaŭ, što «na pasadzie dyrektara Kavalenia pieratvaryŭ Instytut historyi ŭ mahiłu, pakolki źniščyŭ u navukovaj ustanovie apošnija reštki akademičnych svabodaŭ, jakija pavažali navat u savieckija hady».
Baraćba namiačajecca i za adzinuju vakansiju akademika pa śpiecyjalnaści «optyka». Pretendentaŭ dvoje: doktar fizika-matematyčnych navuk, śpiecyjalist pa łaziernaj fizicy Uładzimir Bieły i jaho kaleha, jaki śpiecyjalizujecca na fizicy infračyrvonych pramianioŭ, Siarhiej Cichamiraŭ.
Jašče bolš vostraja kankurencyja budzie za zvańnie akademiki pa śpiecyjalnaści «infarmacyjnyja technałohii» — adna vakansija i čatyry pretendenty.
Piać vyłučencaŭ na dva miescy i na zvańnie «akademikaŭ ad ziamli», heta značyć pa śpiecyjalnaści «ahrapramysłovyja technałohii». U liku pretendentaŭ hałoŭny lnavod krainy Ivan Hołub, hałoŭny pa charčavańni Zianon Łoŭkis, inicyjatar stvareńnia ruchu «Biełaja Ruś» Vitold Pieścis, hiendyrektar RUP «Navukova-praktyčny centr NAN Biełarusi pa ziemlarobstvie» Fiodar Pryvałaŭ i Piatro Kazakievič — aŭtar šmatlikich płuhoŭ, ilnoŭboračnych mašyn, kompleksaŭ dla mielijaracyi.
Što tyčycca členaŭ-karespandentaŭ, to były ministr adukacyi Michaił Žuraŭkoŭ pasprabuje atrymać hetaje zvańnie pa śpiecyjalnaści «infarmacyjnyja technałohii». Deputat Ihar Marzaluk moža stać člen-karam pa śpiecyjalnaści «archieałohija», eks-staršynia Kanstytucyjnaha suda i eks-hienprakuror Ryhor Vasilevič vyłučany kandydatam u člen-kar pa śpiecyjalnaści «pravaznaŭstva», a hałoŭny transpłantołah Aleh Rumo, adpaviedna, pa śpiecyjalnaści «transpłantałohija».